यावल शहरातील घटनेने जिल्हा हादरला
यावल (प्रतिनिधी) :- शहरातील बाबूजी पुरा भागातील रहिवासी असलेला सहा वर्षीय बालक शुक्रवारी ईद-ए-मिलाद या सणाच्या दिवशी सायंकाळी बेपत्ता झाला होता. शोध सुरू असताना या बालकाचा मृतदेह शनिवारी घराशेजारील रहिवाशाच्या घरातील कोठीत जळालेल्या अवस्थेत सापडल्याने खळबळ उडाली. खुनाचा हा प्रकार उघडकीस आल्यानंतर मोठ्या संख्येत संतप्त जमाव बाबुजीपुरा भागात दाखल झाला. दरम्यान, शहरातील वातावरण पाहता दंगा नियंत्रण पथक दाखल झाले आहे.
यावल शहरातील बाबुजीपुरा भागातील रहिवासी मो.हन्नान खान मजीद खान (वय ६) हा मजीद खान जनाब यांचा मुलगा शुक्रवार दि. ५ सप्टेंबर सायंकाळी ६ वाजेपासून बेपत्ता असल्याने त्याचा सर्वत्र शोध घेण्यात आला. मात्र तो सापडला नाही. तर शनिवारी सकाळी ११ वाजेच्या सुमारास या बालकाचा मृतदेह त्यांच्याच शेजारी राहणार्या बिस्मिल्ला खलीफा दस्तगीर खलीफा यांच्या दुमजली घरातील वरच्या मजल्यावर एका कोठीत जळालेल्या अवस्थेत मिळून आला.
घटनेची माहिती वार्यासारखी शहरात पसरली व घटनास्थळी प्रचंड जमाव एकत्र झाला जमावास शांत करण्याकरीता डीवायएसपी अनिल बडगुजर, पोलिस निरिक्षक रंगनाथ धारबळे, शरद कोळी, सहायक पोलिस निरीक्षक अजय वाढवे, उपनिरीक्षक अनिल महाजन, पोलिस उपनिरीक्षक एम.जे.शेख तसेच मुस्लिम समाजातील मान्यवरांनी प्रयत्न केले. फॉरेन्सिक पथक दाखल झाले असून शहरात सध्या तणावाचे वातावरण असल्याने बाबुजी पुरा भागात प्रचंड पोलिस बंदोबस्त तैनात करण्यात आला आहे. मृतदेह ग्रामीण रुग्णालयात दाखल करण्यात आला आहे.
