मुक्ताईनगर पोलीस स्टेशनला मुलाविरुद्ध गुन्हा दाखल
मुक्ताईनगर (प्रतिनिधी) – तालुक्यातील निमखेडी खुर्द येथे बायको माहेरी जाण्यासाठी आई-वडील जबाबदार असल्याचा ठपका ठेवत एका मुलाने त्याच्या आईवडिलांचे घर जाळण्याचा प्रयत्न केला आहे. याप्रकरणी मुक्ताईनगर पोलीस स्टेशनला गुन्हा दाखल करण्यात आला आहे.
समाधान भीमराव घोडकी असे या गुन्हा दाखल झालेल्या मुलाचे नाव आहे. त्याची बायको माहेरी गेल्यानंतर आपल्या आई-वडिलांनीच फुस दिल्याचा त्याला संशय होता. यावरून त्याने आई- वडिलांना धमकावले देखील होते. यानंतर बापावरती संशय घेत दगड घेऊन तुम्हाला मारतो असा धमकावत त्याने घरातील सर्व वस्तू जाळून टाकले. यात किमान आठ हजार रुपये किमतीचे संसार उपयोगी, कपडे, धान्य, गादी, पलंग व घरातील इतर साहित्य जळून खाक झाले.
या संदर्भात मुक्ताईनगर पोलीस स्टेशनला संशयित समाधान घोडकी याची आई सुरजाबाई भिमराव घोडकी यांच्या फिर्यादीवरून त्याच्याविरोधात गुन्हा दाखल करण्यात आला आहे. पुढील तपास सहाय्यक फौजदार संजीव पाटील करत आहेत.