बारामती (वृत्तसंस्था ) -आईला नवीन मोबाईल घेऊन देण्याचा आग्रह करणाऱ्या मुलाला आईने पैसेच नसल्याने मोबाईल घेऊन दिला नाही त्यामुळे शालेय विद्यार्थ्याने गळफास घेऊन आत्महत्या केल्याची दुर्दैवी घटना तालुक्यात घडली असून या घटनेमुळे हळहळ व्यक्त होत आहे.
शुभम मोतीराम धोत्रे असे या दुर्दैवी मुलाचे नाव आहे. तो अंजनगाव येथील सोमेश्वर विद्यालयात इयत्ता नववीमध्ये शिक्षण घेत होता. मिळालेल्या माहितीनुसार, शुभमचे वडील वारले आहेत आणि त्याची आई मोलमजुरी करून उदरनिर्वाह करते.
शुभम गेली काही दिवसांपासून आईकडे नवीन मोबाईल घेण्यासाठी हट्ट करीत होता. पण परिस्थितीमुळे आई मोबाईल घेऊ शकत नव्हती. त्यातून निराश झालेल्या शुभमने गळफास घेऊन आत्महत्या केली.
घटनेची माहिती मिळताच माळेगाव पोलीस ठाण्याचे पोलीस निरीक्षक अरुण अवचर यांनी घटनास्थळाला भेट देत पंचनामा केला. मृतदेह शवविच्छेदनासाठी पाठवण्यात आला असून अधिक तपास माळेगाव पोलीस करीत आहेत.
