एमआयडीसी पोलीस स्टेशनला नोंद
जळगाव (प्रतिनिधी) :- तालुक्यातील चिंचोली शिवारातील वैद्यकीय संकुलाच्या बांधकामाच्या ठिकाणावरून स्टील रॉड, स्केटर ट्युब आणि लोखंडी आसारी यासह इतर बांधकामाचे साहित्य असा एकुण २५ हजारांचा मुद्देमाल अज्ञात चोरट्यांनी चोरून नेल्याचे शनिवारी उघडकीला आले. याप्रकरणी सायंकाळी ५ वाजता एमआयडीसी पोलीस ठाण्यात अज्ञात चोरट्यांविरोधात गुन्हा दाखल करण्यात आला.
तालुक्यातील चिंचोली शिवारात सर्व पॅथींचा समावेश असलेल्या वैद्यकीय संकुलाचे बांधकाम सुरू आहे. त्या ठिकाणी बांधकाम साहित्य ठेवण्यात आले असून स्टोअर किपरही कार्यरत आहे. ८ डिसेंबर रोजी संध्याकाळी काम थांबल्यानंतर रात्रीतून अज्ञात चोरट्यांनी लोखंडी चॅनल, रॉड, स्केअर ट्यूब असे एकूण २५ हजार रुपये किमतीचे साहित्य चोरून नेले. हा प्रकार शनिवारी ९ डिसेंबर रोजी सकाळी ९ वाजता उघडकीला आले. स्टोअर किपर नितीन धाईतडक यांनी एमआयडीसी पोलिस ठाण्यात फिर्याद दिली. त्यावरून सायंकाळी ५ वाजता अज्ञात चोरट्याविरुद्ध गुन्हा दाखल करण्यात आला आहे. पुढील तपास पोहेकॉ अल्ताफ पठाण करीत आहेत.
