यावल (प्रतिनिधी) – तालुक्यातील अट्रावल येथे शनिवारी सकाळी ११ वाजेच्या सुमारास दोन गटात दंगल झाली असून परस्परांकडून दगडफेक करण्यात आली. त्यात महीला फौजदारासह दोन्ही गटाकडील ८ते १० जण जखमी झाले आहेत. शुक्रवारी सायंकाळी १२ गाड्या वरून झालेला वाद शनिवारी उफाळून आला. महापुरुषांच्या पुतळ्याचे विटंबन झाल्याने परस्परामधे हाणामारी झाली. घटनेचे वृत्त कळताच येथील पोलीस पथक घटनास्थळी पोहोचले. यात येथील सुनिता कोळपकर ह्या महिला फौजदार जखमी झाले आहेत. पोलीस अधीक्षक एम राजकुमार, अप्पर पोलीस अधीक्षक चंद्रकांत गवळी, उपविभागीय पोलीस उपअधीक्षक डॉ. कुणाल सोनवणे घटनास्थळी तळ ठोकून आहेत. दरम्यान प्रशासनाच्या वतीने महापुरुषांच्या पुतळ्याची पुनर्स्थापना करण्यात आली आहे. गावात सध्या तणावपूर्ण शांतता आहे.
अट्रावल या गावात पहाटे ६ वाजता महापुरूषांच्या पुतळ्याची तोडफोड करून विटंबना करण्यात आल्याचा धक्कादायक प्रकार घडला आहे. सुमारे दहा-बारा जणांच्या जमावाने पहाटे सव्वासहा वाजेच्या सुमारास हा प्रकार केला. त्यांनी पहिल्यांदा येथील पथदिवा फोडून नंतर पुतळ्याची तोडफोड केली. हा आवाज ऐकून परिसरातील ग्रामस्थांनी त्यांना हटकण्याचा प्रयत्न केला. मात्र त्या जमावाने या ग्रामस्थांना मारहाण करत पलायन केले. काही मिनिटांमध्येच ही वार्ता परिसरात पसरताच दोन गटांमध्ये दगडफेकीसह तुफान हाणामारी झाली. याची माहिती मिळताच पोलिसांनी घटनास्थळी धाव घेऊन वातावरण निवळण्याचा प्रयत्न केला. याप्रसंगी पोलिसांवरही दगडफेक करण्यात आली. तथापि, अतिरिक्त कुमक मागविण्यात आल्याने लवकरच वातावरण नियंत्रणात आले.
