पाचोरा तालुक्यातील घटना
पाचोरा (प्रतिनिधी) : तालुक्यातील एका गावातील १३ वर्षीय अल्पवयीन मुलीस काहीतरी फूस व आमिष दाखवून अज्ञात इसमाने रात्रीच्या वेळी पळवून नेल्याची घटना घडली होती. संशयित आरोपी तरुणास अल्पवयीन मुलीसह काही तासातच नाशिक येथून ताब्यात घेत पाचोरा येथे आणण्यात आले आहे.
पाचोरा तालुक्यातील एका गावात दि. ५ जुलै रोजी रात्री ९ ते ६ जुलै रोजी रात्री अडीचच्या सुमारास १३ वर्षीय अल्पवयीन मुलीस कोणीतरी अज्ञात इसमाने काहीतरी फुस लावून व आमिष दाखवून तिस पळवून नेले. या गुन्ह्याचा तपास हा पोलीस निरीक्षक अशोक पवार यांच्या मार्गदर्शनाखाली पोलीस हेड कॉन्स्टेबल नरेंद्र नरवाडे हे करीत होते. त्यांनी लगेच तपास यंत्रणा फिरवून कामाला सुरुवात केली व अल्पवयीन मुलीस पळवून नेणारा संशयित आरोपी नाशिक येथे असल्याची माहिती मिळताच नाशिक येथील संबंधित पोलीस स्टेशनशी संपर्क साधला.
संशयित आरोपीस मुलीस ताब्यात घेण्यास सांगितले व क्षणाचा विलंब न करता पाचोरा येथून पोलीस हेड कॉन्स्टेबल अशोक हटकर व महिला पोलीस प्रियंका अहिरे हे नाशिक रवाना झाले. संबंधित पोलीस स्टेशन येथे जाऊन संशयित आरोपीसह मुलीस ताब्यात घेऊन पाचोराकडे रवाना झाले. सकाळी पोलीस स्टेशन येथे संशयित व सदर तरुणीला आणण्यात आले आहे. सदर संशयित आरोपीची चौकशी सुरु असून लवकरच योग्य ती कारवाई केली जाईल अशी माहिती “केसरीराज” ला पीएसआय परशुराम दळवी यांनी दिली.