एरंडोल तहसील कार्यालय परिसरात कारवाई; चालकाविरुद्ध गुन्हा
एरंडोल (प्रतिनिधी) – एरंडोल तहसील कार्यालय परिसरात अवैधरित्या गौण खनिज वाळूची वाहतूक करणाऱ्या डंपरवर महसूल व पोलिसांनी कारवाई करत ४ लाख २० हजार रुपयांचा मुद्देमाल जप्त केला. याप्रकरणी चालकाविरुद्ध एरंडोल पोलीस ठाण्यात गुन्हा दाखल करण्यात आला आहे.
१५ जुलै रोजी पहाटे ३.१५ ते सकाळी ८.३० या कालावधीत ही कारवाई करण्यात आली. कारवाईदरम्यान सुमारे २० हजार रुपये किमतीची चार ब्रास वाळू तसेच ४ लाख रुपये किमतीचा टाटा अल्ट्रा एसएलआर (एमएच-२०-जीसी-२०८३) डंपर जप्त करण्यात आला.
याप्रकरणी वैभव श्रीराम पाटील (वय ४२), ग्रामविकास अधिकारी, एरंडोल यांच्या फिर्यादीवरून इम्रान नबी पठाण (रा. अंधारी, ता. सिल्लोड, जि. छत्रपती संभाजीनगर) याच्याविरुद्ध भारतीय न्याय संहितेच्या कलम ३०३(२), महाराष्ट्र जमीन महसूल संहिता १९६६ मधील कलम ४८(७), ४८(८) तसेच खाण व खनिज (विकास व विनियमन) अधिनियम १९५७ मधील संबंधित तरतुदींनुसार गुन्हा दाखल करण्यात आला आहे. पुढील तपास पोलीस हेड कॉन्स्टेबल किरण पाटील करीत आहेत.
