पारोळा तालुक्यात विचखेडे येथे घडली होती घटना
पारोळा (प्रतिनिधी) :- तालुक्यातील विचेखड्याजवळ दि. ४ रोजी कारने दुचाकीला दिलेल्या धडकेत १ ठार तर २ जण गंभीर जखमी झाल्याची घटना घडली होती. यातील दुसरा जखमी रामा कौतिक कंडारे (१८) याचा दि ७ रोजी धुळे येथे उपचारादरम्यान पहाटे ४ वाजता मृत्यू झाला. अपघातातील कार चालकास अटक न झाल्याने शनिवारी संतप्त नातेवाईक व समाजबांधवानी पारोळा पोलीस स्टेशन येथे मृतदेह घेऊन ठिय्या आंदोलन केले होते.
पारोळा तालुक्यातील विचेखड्याजवळ दि.४ जून रोजी सायंकाळी साडेसातच्या वाजेच्या सुमारास विजय अंभोरे (वय २४), नितीन पगारे (वय २४), रामा कौतिक कंडारे (वय १८, सर्व रा. पारोळा) हे आपल्या पल्सर कंपनीच्या मोटरसायकलने वसंतनगर येथे धार्मिक कार्यक्रमासाठी जात असताना वाहन नादुरुस्त झाल्याने सदरचे वाहन लोटून आणत असताना मागून भरधाव वेगाने येणारी स्कोडा कार (एमएच ०१ ए. एक्स ९९१६) ने जोरदार धडक दिली. सदर धडकेत तिघेही गंभीररित्या जखमी होऊन विजय अंभोरे याचा दि ४ रोजी उपचारादरम्यान मृत्यू झाला होता.
तर यातील दुसरा जखमी रामा कौतिक कंडारे (१८ रा. पारोळा) याचा दि ८ रोजी धुळे येथे उपचारादरम्यान मृत्यू झाला. याप्रकरणी तीन दिवस उलटूनही सदर कार चालकाला अटक न केल्याने संतप्त नातेवाईकांनी पारोळा पोलीस स्टेशनला मृतदेह आणून ठिय्या आंदोलन केले. कारचालकाला अटक का केली नाही म्हणून पारोळा पोलिसांवर रोष व्यक्त केला. यावेळी पोलीस निरीक्षक सचिन सानप यांनी, लवकरच संशयित आरोपीस अटक करून कठोर कार्यवाही करू असे आश्वासन दिल्यानंतर मृतदेह नातेवाईकांनी ताब्यात घेतला.
