मंत्री रक्षा खडसे, आ. सावकारे, अमोल जावळे यांच्यासह अनेक जण काठमांडू येथे रवाना
जळगाव (प्रतिनिधी) : आज सकाळी नेपाळ देशात देवदर्शनासाठी जात असलेल्या भाविकांची बस नदीत कोसळली. झालेल्या भीषण अपघातातील बहुतांश प्रवाशी हे भुसावळ, जळगाव येथील असल्याची माहिती समोर आली आहे. घटनास्थळी जळगावहून आ. संजय सावकारे, भाजपचे जिल्हाध्यक्ष अमोल जावळे हे काठमांडू येथे रवाना झाले आहेत. तर केंद्रीय क्रीडा राज्यमंत्री रक्षाताई खडसे या छत्रपती संभाजीनगर येथून काठमांडू येथे विमानाने निघाल्या आहेत.
नेपाळमध्ये आज शुक्रवारी सकाळी उत्तर प्रदेश पासिंगच्या एका बसचा भीषण अपघात झाला. ही बस (युपी ५३ एफटी ७६२३) या क्रमांकाची होती. पोखरा येथून काठमांडू येथे बस जात होती. भरधाव वेगाने धावणारी ही बस तणाहून जिल्ह्यातल्या मार्सयांगडी नदीच्या पात्रात जाऊन पडली. या बसमध्ये ४१ प्रवाशांसह चालक व क्लिनर असे एकुण ४३ जण बसमध्ये प्रवास करत होते. यातील १४ जणांचा जागीच मृत्यू झाल्याची प्राथमिक माहिती मिळत आहे. तर, इतर अन्य १६ जण गंभीर जखमी झाले असून त्यांना नजीकच्या रुग्णालयात उपचारासाठी दाखल करण्यात आले आहे.
दरम्यान, घटनेची माहिती मिळताच जळगाव जिल्ह्यात खळबळ उडाली आहे. नातेवाईकांना अद्यापही आप्तांची माहिती मिळत नसल्याने काळजी लागून राहिली आहे. घटनास्थळी नेपाळ येथे केंद्रीय क्रीडा राज्यमंत्री रक्षा खडसे, आ. संजय सावकारे, भाजप जिल्हाध्यक्ष अमोल जावळे, अतुल झांबरे यांच्यासह भुसावळ तालुक्यातील समाजबांधव हे रवाना झाले आहे. रक्षा खडसे या छत्रपती संभाजीनगर येथून तर आ. सावकारेंसह इतर हे मुंबई येथून काठमांडू येथे विमानाने रवाना झाले आहेत.
बसमध्ये प्रवास करीत असलेले प्रवाश्यांची नावे
