धुळे जिल्ह्यातील फागणे गावाजवळ घडली घटना
जळगावच्या तांबापुरावर शोककळा
जळगाव (प्रतिनिधी) : शहरातील तांबापुरा भागातील तीन तरुण जळगाववरून धुळे येथे जात असताना वाटेत फागणे गावाजवळ त्यांची दुचाकी अनियंत्रित झाल्यामुळे डिव्हायडरला धडकल्याची धक्कादायक माहिती बुधवार दि. १९ जून रोजी सकाळी ७ वाजेच्या सुमारास उघडकीला आली आहे. घटनेत एका तरुणाचा मृत्यू झाला असून दोन जण गंभीर जखमी आहेत.
जखमी दोघांवर धुळे येथील रुग्णालयात उपचार सुरू असल्याची माहिती मिळाली आहे. फागणे पोलीस घटनास्थळी दाखल झाले असून घटनेची माहिती घेत आहेत. घटनेमध्ये जूनेर शेख, अरबाज खाटीक, सलमान खाटीक असे २० ते २५ वयोगटातील तरुण हे जळगाववरून धुळे येथे काही कामानिमित्त सकाळी निघाले होते. सुमारे ७ वाजेच्या आसपास फागणे गावाजवळ आले असताना चालकाचे दुचाकीवरील नियंत्रण सुटल्याने ते डिव्हायडरला जोरात धडकले.
यामध्ये जुनेर शेख याचा मृत्यू झाला आहे. तर अरबाज खाटीक व सलमान खाटीक हे गंभीर जखमी झाले आहेत. आजूबाजूच्या नागरिकांनी त्यांना धुळे येथील रुग्णालयात दाखल केले आहे. त्यांच्यावर उपचार सुरू आहेत तर फागणे पोलीस घटनेची पुढील माहिती घेत आहेत.
