ओव्हरटेकच्या वादातून कारची तोडफोड
अमळनेर (प्रतिनिधी) : वाहन चालवताना साईड न दिल्याचा रागातून चौघांनी मिळून एका व्यापाऱ्याची कार अडवून शिवीगाळ केली, तसेच कारच्या बोनेटवर दगड मारून आणि ट्रॅक्टरने कारला धडक देऊन नुकसान केल्याची घटना घडली आहे. अमळनेर तालुक्यातील डांगरी गावाच्या बस स्टँडसमोर गुरुवारी दुपारी हा प्रकार घडला. याप्रकरणी अमळनेर पोलीस ठाण्यात चौघांविरुद्ध गुन्हा दाखल करण्यात आला आहे.
फिर्यादी तुषार लालचंद पवार (वय २४, रा. शारदा कॉलनी, अमळनेर) हे गुरुवारी (१९ फेब्रुवारी) दुपारी ४:१५ वाजेच्या सुमारास त्यांच्या चारचाकी वाहनाने (क्रमांक एमएच ५४ बी ७००७) अमळनेरकडे येत होते. डांगरी गावाच्या बस स्टँडसमोर डांगरी येथीलच रहिवासी असलेल्या चार संशयितांनी त्यांचे ट्रॅक्टर ट्रॉलीसह रस्त्याच्या मध्यभागी आडवे लावून तुषार यांची कार अडवली. वाहनाला साईड का दिली नाही, या कारणावरून संशयितांनी तुषार यांना शिवीगाळ केली. इतक्यावरच न थांबता त्यांनी कारच्या बोनेटवर दगड मारून नुकसान केले. त्यानंतर ट्रॅक्टर चालकाने ट्रॅक्टर सुरू करून तुषार यांच्या कारला जोराची धडक दिली, ज्यामध्ये वाहनाचे मोठ्या प्रमाणावर नुकसान झाले आहे.
तुषार पवार यांनी दिलेल्या तक्रारीवरून अमळनेर पोलिसांनी डांगरी येथील शुभम सुनील पाटील, मुकेश प्रकाश सोनवणे, सुनील धुडकू पाटील, धिरज सुनील पाटील या चार संशयितांविरुद्ध गुन्हा दाखल केला आहे. या प्रकरणी अमळनेर पोलीस ठाण्यात गुन्हा नोंदवण्यात आला आहे. उपनिरीक्षक समाधान गायकवाड यांच्या मार्गदर्शनाखाली पोलीस हवालदार काशिनाथ नामदेव पाटील या प्रकरणाचा पुढील तपास करत आहेत. अद्याप कोणालाही अटक करण्यात आलेली नाही.
