चाळीसगाव येथे फौजदारी लिपिकाला केले गजाआड
धुळे येथील लाचलुचपत प्रतिबंधक विभागाची कारवाई
जळगाव (प्रतिनिधी) – चाळीसगाव येथील तहसीलदार तथा कार्यकारी दंडाधिकारी यांचेकडे दाखल प्रकरणात संशयित आरोपीला जामिनावर मुक्त करण्यासाठी अडीच हजारांची लाच घेताना फौजदारी लिपिक दीपक बाबुराव जोंधळे याला लाचलुचपत प्रतिबंधक विभाग, धुळे यांनी धडक कारवाई केली आहे. यामुळे चाळीसगाव शहरात खळबळ उडाली आहे.
यातील तक्रारदार यांचे पक्षकारांविरुद्ध दाखल गुन्ह्यामध्ये मेहुणबारे पोलीस स्टेशनकडून प्रतिबंधक कारवाईचा प्रस्ताव तहसीलदार तथा कार्यकारी दंडाधिकारी, चाळीसगाव यांच्याकडे सादर करण्यात आला होता. सदर प्रतिबंधक कारवाईचे प्रकरण दाखल करून त्यामधील संशयित आरोपी यांना पुढील तारीख न देता जामिनावर मुक्त करण्याकरिता तहसील कार्यालयातील फौजदारी लिपिक दीपक बाबूराव जोंधळे (वय- ४७ वर्ष, रा. शास्त्रीनगर, कापड मिल मागे,चाळीसगाव) याने मदत करण्यासाठी अडीच हजार रुपयाची लाचेची मागणी करून सदर रक्कम ही पंचांसमक्ष स्विकारली आहे. त्यावरून दीपक जोंधळे यांचेविरुद्ध चाळीसगाव शहर पोलीस स्टेशन येथे गुन्हा दाखल करण्याची प्रक्रिया सुरू आहे.
कारवाई अभिषेक पाटील, पोलीस उपअधीक्षक, लाचलुचपत प्रतिबंधक विभाग, धुळे यांच्या मार्गदर्शनाखाली पो. हवा. राजन कदम, शरद काटके, पो. शि. संतोष पावरा, गायत्री पाटील, मकरंद पाटील, चालक पोहवा सुधीर मोरे यांनी केली आहे. दरम्यान या घटनेमुळे खळबळ उडाली आहे.
