अमळनेर तालुक्यातील ढेकू शिवारातील घटना
अमळनेर (प्रतिनिधी) : तालुक्यातील पिंगळवाडे येथील आश्रम शाळेत दोन्ही मुलांना प्रवेशासाठी घेऊन जाणाऱ्या पित्यावर सोमवारी दि. २४ जून रोजी दुर्दैवी वेळ ओढवली आहे. तालुक्यातील ढेकू शिवारातील इंडीयन गॅस एजन्सी कार्यालयासमोरील रस्त्यावर दोन दुचाकीच्या समोरासमोर झालेल्या भीषण अपघातात एका मुलाचा दुदैवी मृत्यू झाला तर दुसऱ्या मुलासह पिता जखमी झाला आहे. याप्रकरणी अमळनेर पोलीस ठाण्यात दुचाकीस्वारावर गुन्हा दाखल करण्यात आला आहे.
अमित शिंगा पावरा (रा. मांडळ ता. अमळनेर) असे मयत मुलाचे नाव आहे. अनिल ठाणसिंग पावरा (रा बोपाणी ता शिरपूर हल्ली मुक्काम मांडळ ता अमळनेर) व त्याचा साडू शिंगा पांडू पावरा हे मांडळ येथील विकास बडगुजर यांच्या शेतात सालगडी म्हणून काम करतात. सोमवारी दि. २४ रोजी दुपारी ४ वाजता शिंगा पांडू पावरा हा त्याची मोटरसायकल (एमएच १८, एयु ९३२९) वर मुलगा अमित शिंगा पावरा (वय १२) व उमेश पावरा यांना पिंगळवाडे येथील आश्रम शाळेत प्रवेश घेण्यासाठी घेऊन जात होता.
त्यावेळी ढेकू गावाजवळ गॅस एजन्सीजवळ समोरून येणारी मोटरसायकल (क्रमांक एम एच १९ बी डी ७४१६) यांच्यात समोरासमोर टक्कर झाली. यात अमित शिंगा पावरा जागीच ठार झाला तर उमेश शिंगा पावरा आणि समोरील मोटरसायकलवर बसलेले चालक अजय वानखेडे व राहुल वानखेडे दोघे रा. आर्डी ता अमळनेर हे जखमी झाले आहेत. त्यांना अमळनेर येथील ग्रामीण रूग्णालयात दाखल केले. अनिल पावरा याच्या फिर्यादिवरून अजय वानखेडे याच्याविरूद्ध मृत्यूस कारणीभूत ठरल्याचा गुन्हा अमळनेर तालुका पोलीस ठाण्यात दाखल करण्यात आला असून तपास संजय पाटील करीत आहेत
