लाचलुचपत प्रतिबंधक विभागाची धडक कारवाई, ममुराबादसह म्हसावद येथे खळबळ
जळगाव प्रतिनिधी : वाळू वाहतूक करणारा डंपर सोडून देण्यासाठी आणि त्यावर कारवाई न करण्यासाठी ३० हजार रुपयांची लाच स्वीकारताना ममुराबाद येथील तलाठी आणि म्हसावद येथील मंडळ अधिकाऱ्याला लाचलुचपत प्रतिबंधक विभागाने रंगेहात पकडले आहे. ही कारवाई दि. ११ फेब्रुवारी रोजी जळगाव शहरात करण्यात आली.
या प्रकरणी अटक करण्यात आलेल्या लोकसेवकांमध्ये सदानंद व्यंकटी मुंडे (वय ३४), तलाठी, सजा ममुराबाद, ता. जि. जळगाव (वर्ग-३) व अभिजित नामदेव येवले (वय ३९), मंडळ अधिकारी, सजा म्हसावद, ता. जि. जळगाव (वर्ग-३) यांचा समावेश आहे. तक्रारदार हे वाळू वाहतुकीचा व्यवसाय करतात. दि. ४ फेब्रुवारी रोजी रात्री गस्तीवर असताना तलाठी सदानंद मुंडे यांनी वाळूने भरलेला डंपर पकडला होता. मात्र, मंडळ अधिकारी अभिजित येवले यांनी फोनवरून दिलेल्या सूचनेनुसार तो डंपर कारवाई न करता सोडून देण्यात आला. या उपकाराच्या बदल्यात आणि पुढील कारवाई टाळण्यासाठी मुंडे आणि येवले या दोघांनी मिळून तक्रारदाराकडे ५० हजार रुपयांच्या लाचेची मागणी केली होती.
तक्रारदाराची लाच देण्याची इच्छा नसल्याने त्यांनी लाचलुचपत प्रतिबंधक विभाग, जळगाव येथे तक्रार नोंदवली. या तक्रारीची पडताळणी केली असता, तडजोडीअंती ३० हजार रुपये स्वीकारण्याचे ठरले. एसीबीच्या पथकाने जुने जळगाव परिसरातील अभिजित येवले यांच्या घराच्या खाजगी कार्यालयात सापळा रचला. यावेळी तलाठी सदानंद मुंडे यांना ३० हजार रुपयांची लाच स्वीकारताना पकडण्यात आले.
झडतीमध्ये सदानंद मुंडे यांच्याकडे रोख ४०,२०० रुपये आणि एक विवो कंपनीचा मोबाईल फोन तर अभिजित येवले यांच्याकडे रोख ७,६०० रुपये आणि एक विवो कंपनीचा मोबाईल फोन असा मुद्देमाल जप्त करण्यात आला आहे.
याप्रकरणी शनिपेठ पोलीस ठाण्यात भ्रष्टाचार प्रतिबंधक अधिनियमान्वये गुन्हा दाखल करण्यात आला आहे. ही कारवाई पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या मार्गदर्शनाखाली करण्यात आली. सापळा पथकात योगेश ठाकूर (पोलीस उपअधीक्षक), तपास अधिकारी स्मिता नवघरे (पोलीस निरीक्षक), श्रीमती रेश्मा अवतारे, सुरेश पाटील, बाळू मराठे, राकेश दुसाने, प्रदीप पोळ आणि चंद्रशेखर चौधरी यांचा समावेश होता. कोणत्याही लोकसेवकाने लाचेची मागणी केल्यास त्वरित टोल-फ्री क्रमांक १०६४ किंवा जळगाव एसीबी कार्यालयाशी ०२५७-२२३५४७७ या क्रमांकावर संपर्क साधावा.
