लाचलुचपत प्रतिबंधक विभागाची फैजपूर पोलीस स्थानकात कारवाई
जळगाव (प्रतिनिधी) : तक्रारदाराचा जुगाराचा अड्डा सुरळीत चालू ठेवण्यासाठी व त्यावर कुठलीही कायदेशीर कारवाई करू नये याकरिता फैजपूर पोलीस स्थानकातील सहाय्यक फौजदारासह दोन पोलीस नाईक यांना ४ हजार रुपयाची लाच घेताना लाचलुचपत प्रतिबंधक विभागाने शुक्रवार दि. २४ मार्च रोजी संध्याकाळी ताब्यात घेतले आहे तर लाचलुचपत प्रतिबंधक विभागाने गेल्या ८ दिवसात केलेली ही तिसरी कारवाई असून एकूण सात लाचखोरांना आतापर्यंत गजाआड केलेले आहे.
पाडळसे येथील तक्रारदारांचा फैजपूर पोलीस स्थानकाच्या हद्दीतील बामणोद येथे पत्त्याचा क्लब आहे. हा जुगाराचा क्लब सुरळीत चालू राहू देण्यासाठी दरमहा रुपये ४ हजारची लाचेची मागणी संशयित आरोपी यांनी केली होती. तक्रारदाराने याबाबत लाचलुचपत प्रतिबंधक विभाग, जळगाव यांच्याकडे तक्रार दिली होती.
शुक्रवारी तक्रारदार हे संशयित आरोपी सहाय्यक फौजदार हेमंत वसंत सांगळे(वय ५२) यांना भेटले. त्यावेळी तक्रारदाराकडे कामाचे आणि पैशांची बोलणी झाल्यावर सांगळे यांनी मोबाईल फोनवरून दुसरे संशयित आरोपी पोलीस नाईक किरण अनिल चाटे (वय ४४ वर्ष) यांना फोन करून किती पैसे घ्यायचे याबाबत बोलणी केली.
त्यानंतर रकमेत तडजोड करून सांगळे यांनी तक्रारदाराकडे स्वतःसाठी आणि पोलीस नाईक किरण चाटे यांच्यासाठी ३ हजार रुपये लाचेची मागणी केली. तसेच गोपनीय शाखेतील अमलदार तिसरे संशयित आरोपी महेश ईश्वर वंजारी (वय ३८) यांच्यासाठी १ हजार रुपये अशी ४ हजार रुपये लाचेची मागणी केली. सदर मागणी केलेली रक्कम सांगळे यांनी पंचासमक्ष स्वतः स्वीकारून वंजारी यांचे जवळ दिली.
महेश वंजारी यांना सदर रक्कम पत्त्याचा क्लब सुरळीत चालू देण्यासाठीची माहिती असतानाही त्यांनी ती लाच रक्कम स्वीकारली. म्हणून तिन्ही संशयित आरोपीविरुद्ध फैजपूर पोलीस स्टेशन येथे गुन्हा दाखल करण्यात आला आहे. कारवाई पोलीस उपअधीक्षक शशिकांत पाटील, निरीक्षक एस. के. बच्छाव, पथक दिनेशसिंग पाटील, ईश्वर धनगर, राकेश दुसाने यांच्यासह कर्मचाऱ्यांनी सहकार्य केले. दरम्यान लाचलुचपत प्रतिबंधक विभागाने गेल्या ८ दिवसात ही तिसरी कारवाई केली आहे. कारवाईमुळे पोलीस दलात खळबळ उडाली आहे.
