पारोळा तालुक्यातील देवगाव येथील घटना
पारोळा (प्रतिनिधी) – तालुक्यातील देवगाव येथे भरधाव आयशरवरील मद्यधुंद चालकाने बेजबाबदारपणे वाहन चालवून सहा वर्षीय चिमुरडीला धडक देऊन गंभीर जखमी केले. दरम्यान रुग्णालयात नेले असता त्या चिमुरडीला डॉक्टरांनी मयत घोषित केले आहे. यामुळे देवगावमध्ये लोकांनी आयशर चालकाविरोधात संताप व्यक्त केला. पारोळा पोलीस स्टेशनला आयशर चालकाविरोधात गुन्हा दाखल करण्यात आला आहे.
पूजा अनिल भिल (वय ६ वर्ष, रा. वसंत जिभाऊ नगर, देवगाव, ता. पारोळा) असे मयत बालिकेचे नाव आहे. शुक्रवारी ८सप्टेंबर रोजी दुपारी तीन वाजेच्या सुमारास ती गावामध्ये खेळत असताना देवगाव फाट्याजवळील एका भरधाव आयशर वाहनाने तिला जबर धडक दिली. यावेळी नागरिकांनी तिच्या आई-वडिलांना घरून बोलावून आणले. त्यानंतर तिला पारोळ्यातील कुटीर रुग्णालय येथे उपचारासाठी दाखल केले असता तेथे वैद्यकीय अधिकाऱ्यांनी बालिकेस मयत घोषित केले. यावेळी भरधाव आयशर क्रमांक (एमएच ०४ एच एस ४७३१) वरील चालक हा दारूच्या नशेत असल्याचे ग्रामस्थांना दिसून आले.
त्यानंतर ग्रामस्थांनी संताप व्यक्त करीत त्याला पोलिसांच्या ताब्यात दिले. निलेश संजय बेलदार (वय २४ वर्षे रा. तामसवाडी ता.पारोळा) असे या आयशर वाहन चालकाचे नाव आहे. या घटनेप्रकरणी मुलीचे वडील अनिल भिमा भिल (वय ३२, रा. देवगाव) यांनी दिलेल्या फिर्यादीवरून पारोळा पोलीस स्टेशनला गुन्हा दाखल करण्यात आला आहे. या गुन्ह्याचा तपास पोलीस उपनिरीक्षक वसावे हे करीत आहेत. दरम्यान या घटनेमुळे बालिकेच्या कुटुंबीयांवर आघात कोसळला असून गावावर शोककळा पसरली आहे.
