भुसावळ: जळगाव भुसावळ सेक्शन दरम्यान मालगाडीचे सहा डबे घसरले असून या दुर्घटनेत कोणतीही जीवित हानी झाली नाही. मालगाडीचे डबे घसरल्याने मध्य रेल्वेच्या वाहतूकीवर परिणाम झाला आहे. सकाळी ७.३०च्या सुमारास ही घटना घडली. भुसावळ-नागपूर-दिल्ली मार्गावर भुसावळ येथे मालगाडीचे सहा डबे रुळावरून घसरले.
त्यामुळे या मार्गावरील रेल्वे सेवा ठप्प झाली. मात्र, ही मालगाडी असल्याने सुदैवाने कोणतीही जीवित हानी झाली नाही. या घटनेनंतर रेल्वे प्रशासनाच्या अधिकारी आणि कर्मचाऱ्यांनी घटनास्थळी धाव घेऊन पाहणी केली. सध्या मालगाडीचे डबे पुन्हा रुळावर आणण्याचं काम युद्ध पातळीवर सुरू आहे.
या मार्गावरील वाहतूक केव्हापर्यंत सुरळीत होईल या विषयी माहिती रेल्वे प्रशासनाकडून देण्यात आली नाही. मात्र, दुपारपर्यंत या मार्गावरील वाहतूक पूर्ववत होण्याचा अंदाज वर्तवला जात होता.
