चोपडा तालुक्यातील अकुलखेडा येथील घटना
जळगाव (प्रतिनिधी) : स्थानिक गुन्हे शाखेच्या पथकाने (एलसीबी) गांजा विक्रीप्रकरणी २ आरोपींना अटक करून त्यांच्याकडून तब्बल २.३१ लाख रुपयांचा मुद्देमाल जप्त केला आहे. ही कारवाई चोपडा-शिरपूर रोडवरील अकुलखेडा गावाजवळ करण्यात आली.
स्थानिक गुन्हे शाखेच्या पोलिसांना गुप्त बातमीदारा मार्फत माहिती मिळाली होती. शिरपूर येथून एक इसम मोटारसायकलवर गांजा विक्रीसाठी अकुलखेडा गावाजवळ जाणार आहे, या मिळालेल्या खात्रीशीर माहितीच्या आधारे स्थानिक गुन्हे शाखेच्या आणि चोपडा शहर पोलिसांनी संयुक्त पथक तयार करून सापळा रचला. पोलीसांनी विजय देवराम मोरे (वय २८, रा. भोरखेडा, ता. शिरपूर, जि. धुळे), अविनाश भिका पाटील (वय २६, रा. वाघळुद, ता. धरणगाव, जि. जळगाव) यांना अटक करण्यात आली. दोघांकडून ४ किलो ५०० ग्रॅम गांजा (किंमत ३६ हजाररुपये), २ मोटारसायकली, २ मोबाईल आणि इतर मुद्देमाल असा एकूण २ लाख ३१ हजार रुपयांचा ऐवज जप्त करण्यात आला. याप्रकरणी चोपडा शहर पोलीस ठाण्यात गुन्हा दाखल करण्यात आला आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर यांच्या मार्गदर्शनाखाली करण्यात आली. या कारवाईत चोपडा शहर पोलीस निरीक्षक मधुकर साळवे, सपोनि एकनाथ भिसे, पोउनि गणेश वाघमारे, पोउनि अनिल जाधव, पोह विलेश सोनवणे, दिपक माळी, रविंद्र पाटील, हेमंत पाटील, प्रदीप चवरे, जितेंद्र चव्हाण, गोकुळ सोनवणे, योगेश बोडखे आणि विनोद पाटील यांनी महत्त्वपूर्ण भूमिका बजावली.
