चीनमधील व्हायरसविषयी राज्य शासनाचे पत्रक जारी, सर्दी-खोकल्यावर लवकर उपचार घ्या
जळगाव (विशेष प्रतिनिधी) : – चीन देशामध्ये ह्युमन मेटान्यूमोव्हायरस अर्थात “एचएमपीव्ही” आजाराचा उद्रेक झाल्याच्या बातम्या येत आहेत. हा एक हंगामी रोग आहे जो सामान्यतः आरएसव्ही आणि फ्लूप्रमाणेच हिवाळा आणि उन्हाळयाच्या सुरुवातीला उद्भवतो. या अनुषंगाने डीजीएचएस आणि संचालक, एनसीडीसी, दिल्ली यांनी दि. ३ जानेवारी रोजी एक निवेदन प्रसिध्द केले आहे. त्या संदर्भाने राज्य शासनाच्या पुणे येथील आरोग्य सेवा संचालनालयानेदेखील राज्यातील सर्व उपसंचालक, शल्यचिकित्सक, आरोग्याधिकारी यांना पत्राद्वारे घ्यावयाच्या काळजीविषयी माहिती दिली आहे.
मानवी मेटान्यूमोव्हायरस (एचएमपीव्ही) तीव्र श्वसन संसर्गाचे एक प्रमुख कारण आहे. हा विषाणू सर्वप्रथम नेदरलँडस मध्ये २००१ मध्ये आढळला. मानवी मेटान्यूमोव्हायरस (एचएमपीव्ही) हा एक सामान्य श्वसन विषाणू आहे. (केजीएन)ज्यामुळे व श्वसनमार्गाच्या वरील भागातील संसर्गास (सर्दीसारख्या) कारणीभूत ठरते. महाराष्ट्रात आतापर्यंत एचएमपीव्हीचा एकही रुग्ण आढळलेला नाही. सार्वजनिक आरोग्य विभागाने राज्यातील श्वसनाच्या संसर्गाच्या आकडेवारीचे विश्लेषण केले आहे. वर्ष २०२३ च्या तुलनेत डिसेंबर २०२४ मध्ये कोणतीही वाढ झालेली नाही. तथापी खबरदारीचा एक भाग म्हणून नागरिकांनी श्वसनाच्या संसर्गापासून बचाव करण्यासाठी काय करावे आणि काय करू नये या संदर्भातील सूचनांचे पालन करण्याचे आवाहन आरोग्य विभागाकडून करण्यात आले आहे.
हे करा
> जेव्हा आपल्याला खोकला किंवा शिंका येत असेल तेव्हा आपले तोंड आणि नाक रुमाल किंवा टिश्यू पेपरने झाका.
> साबण आणि पाणी किंवा अल्कोहोल आधारित सॅनिटायझरने आपले हात वारंवार धुवा.
> ताप, खोकला आणि शिंका येत असल्यास सार्वजनिक ठिकाणांपासून दूर राहा.
– भरपूर पाणी प्या आणि पौष्टिक खा.
– संक्रमण कमी करण्यासाठी सर्व ठिकाणी पुरेसे वायुविजन (व्हेंटीलेशन) होईल, याची दक्षता घ्या.
हे करू नये
> हस्तांदोलन
> टिश्यू पेपर आणि रुमालाचा पुनर्वापर
> आजारी लोकांशी जवळचा संपर्क
> डोळे, नाक आणि तोंडाला वारंवार स्पर्श करणे,
> सार्वजनिक ठिकाणी थुंकणे
> डॉक्टरांच्या सल्ल्याशिवाय औषध (सेल्फ मेडिकेशन) पेणे
चीनमधून आलेल्या नवीन विषाणु ह्युमन मेटान्यूमोव्हायरस अर्थात “एचएमपीव्ही” अहवालाबाबत चिंतेचे कारण नाही. याबाबत आवश्यक दक्षता घेण्यात येत असून नाहक भितीचे वातावरण निर्माण करण्याची गरज नाही. तथापी या पार्श्वभूमीवर आपल्या कार्यक्षेत्रातील सर्वेक्षण अधिक गतिमान करुन सर्दी खोकला अर्थात आय एल आय सारी रुग्णांचे नियमित सर्वेक्षण अहवाल सादर करण्यात यावेत, अशा सूचनादेखील पत्रात देण्यात आल्या आहेत. पत्रावर संचालक डॉ. नितीन अंबाडेकर यांची सही आहे.
