यावल तालुक्यातील किनगाव रस्त्यावरील घटना
यावल (प्रतिनिधी) : किनगाव-यावल रत्यावर मोटरसायकलला लाथ मारून दुसऱ्या दुचाकीस्वारांनी पुढे वाहन उभी करून त्याच्याकडून बळजबरीने त्याचे खिशातील १० हजार रुपये रोख व १२ हजार रुपयांचा मोबाईल हिसकावून घेतला. त्याला प्रतिरोध केला असता तरुणाला धारदार शस्त्राने मारहाण केल्याची घटना किनगाव गावाजवळ यावलकडे येताना घडली आहे. याबाबत दरोड्याचा गुन्हा दाखल करण्यात आला आहे. या प्रकरणी यावल पोलिसांनी अवघ्या दोन तासातच आरोपीना ताब्यात घेतल्याची माहिती मिळाली आहे.
भालसिव पिंपरी ता. यावल येथील सरपंच मोहन एकनाथ सपकाळे व त्यांचे सोबत शिवलाल भगवान सपकाळे हे चोपडा येथे शिंदे गट शिवसेनेचे उमेदवार प्रा. चंद्रकांत सोनवणे यांच्या प्रचारार्थ असलेल्या सभेसाठी चोपड़ा येथे गेले होते. ते रात्री ११ वाजून ४५ मिनिटांनी किनगावपासून यावलकडे त्यांच्या ताब्यातील मोटार सायकल (एम एच १९ बीएल ५१) द्वारा येत होते. मागावर (एमएच २८ ए डब्ल्यू २३८) पांढरा रंगाची स्कूटी वरून दोन जण आलेत व त्यांनी मोहन सपकाळे यांच्या दुचाकीला लाथ मारली.
त्यानंतर दोघं संशयितांनी पुढे स्कुटी लावून तुम्हारे पास के सारे पैसे मुझे दे दो नहीं तो में तुम्हें मार डालूंगा अशी धमकी दिली व त्याला मोहन एकनाथ सपकाळे यांनी विरोध केला असता धारदार शस्त्राने त्यांच्या डाव्या बाजूची कमरेतून काढून धमकावले व मानेच्या उजव्या बाजूला चॉपरने दुखापत केली. पॅन्टचे मागील खिशातून दहा हजार रुपये रोख व शर्टाच्या खिशातील अँड्रॉइड १२००० रुपये किमतीचा रेडमी कंपनीचा मोबाईल बळजबरीने हिसकावून घेतला.त्यानंतर ते यावलच्या दिशेने पळून गेले. त्यांनी २२ हजाराचा ऐवज लांबविला आहे.
याबाबत मोहन सपकाळे यांनी तात्काळ यावल पोलीस स्टेशन गाठले व त्यांच्या जवळ असलेल्या मोटरसायकलचा नंबर त्यांनी पाहिलेला होता त्यानुसार तक्रार दिली याबाबत गुन्हा दाखल करण्यात आला आहे. पुढील तपास पीआय प्रदीप ठाकूर यांच्या मार्गदर्शनाखाली पोलीस उपनिरीक्षक सोपान गोरे हे करीत आहे. रात्रीच तपासाची चक्रे फिरवून अवघ्या काही तासातच सदरची गाडी कुणाची? याचा तपास लावून दोघं आरोपींना ताब्यात घेतले असून पुढील कारवाई सुरू केली आहे.
