जिल्हा पोलीस अधीक्षकांची कारवाई
जळगाव (प्रतिनिधी) :- रावेर पोलीस ठाण्यात बदली होऊन साडेतीन महिने उलटले तरी हजर न होणारे पोलीस कर्मचारी भूषण रतीलाल सपकाळे यांना निलंबित करण्याची कारवाई जिल्हा पोलीस अधीक्षक डॉ. महेश्वर रेड्डी यांनी केली.
चार महिन्यांपूर्वी पोलीस दलातील कर्मचाऱ्यांच्या प्रशासकीय बदल्या करण्यात आल्या होत्या. यामध्ये तालुका पोलीस ठाण्यातील पोलीस शिपाई भूषण सपकाळे यांची रावेर पोलीस ठाण्यात बदली करण्यात आली होती. बदलीचे आदेश निघाल्यावेळी सपकाळे हे रजेवर असताना त्यांना दि. २६ जुलै रोजी तालुका पोलीस ठाण्यातून कार्यमुक्त करण्यात आले. आता साडेतीन महिने उलटूनदेखील सपकाळे हे बदली झालेल्या ठिकाणी कर्तव्यावर हजर झाले नाही. तसा अहवाल पाठविण्यात आला. सेवा कालावधीत दीर्घकाळ अनुपस्थितीत राहत असल्याचा ठपका ठेवण्यात आला असून सपकाळे यांना निलंबित करण्यात आले. त्यांची प्राथमिक चौकशी करण्याचे आदेशदेखील देण्यात आले आहे.
