जामनेर तालुक्यातील पहूर येथील घटना
जामनेर (प्रतिनिधी) :- येथील शेतमजूर तरुणाने राहत्या घरात गळफास घेऊन आत्महत्या केल्याची घटना शिवनगर येथे आज शुक्रवारी दि. १५ रोजी दुपारी १२ वाजेच्या सुमारास घडली. याप्रकरणी पहूर पोलिस स्टेशनला अकस्मात मृत्यूची नोंद करण्यात आली आहे.
गोकुळ दिलीप सोनार (वय २८) असे मयत तरुणाचे नाव आहे. तो आई आणि मोठ्या भावासोबत शिवनगरात वास्तव्यास होता. गोकुळ सोनार हे दुसऱ्यांची शेती करत होते. कपाशीचा हंगाम संपल्याने कपाशी उपटून रब्बी हंगामात ज्वारी पेरण्यासाठी त्यांची तयारी सुरू होती. आज सकाळी आई आणि मोठ्या भावासोबत ते शेतात गेले. उपटलेली कपाशी ओली असल्याने ती पेटविण्यासाठी पेट्रोल पंपावरून पेट्रोल आणतो असे सांगून ते शेतातून घराकडे निघाले. मात्र एवढा वेळ का होतोय ? असे मोठ्या भावाने फोन करून विचारले असता फोन न लागल्याने मोठा भाऊ गजानन यांनी शेजारच्यांनी संपर्क साधला.
त्यांना लहान भावाने गळफास घेतल्याची माहिती मिळाली. नंतर ग्रामस्थांनी गोकुळ सोनार यांना तातडीने ग्रामीण रुग्णालयात दाखल केले. डॉ . मयूरी पवार यांनी तपासणीअंती मयत घोषित केले. ग्रामीण रुग्णालयात शवविच्छेदन करण्यात आले. वैद्यकीय अधिकारी डॉ. मयुरी पवार यांच्या खबरीवरून पहूर पोलीस ठाण्यात अकस्मात मृत्यूची नोंद करण्यात आली असून पोलीस निरीक्षक सचिन सानप यांच्या मार्गदर्शनाखाली सहाय्यक फौजदार भरत लिंगायत पुढील तपास करीत आहेत.
लहानपणीच पितृछत्र हरपलेल्या गोकुळला आईने व मोठ्या भावाने चांगले शिक्षण दिले. गोकुळ शेतीसह शेततळ्यांची कामे करीत असे . त्याने दहा-बारा तरुणांना शेततळ्यांच्या कामात रोजगार उपलब्ध करून दिला होता. मनमिळाऊ स्वभाव असलेल्या गोकुळच्या अकाली जाण्याने शिवनगर परिसरात हळहळ व्यक्त होत आहे .
