भुसावळ तालुक्यातील वरणगाव येथील घटना
जळगाव (प्रतिनिधी) :- भुसावळ तालुक्यातील वरणगाव शहरातील सिध्देश्वर नगर मधील बेपत्ता तरुणाचा विहीरीत पडून मृत्यू झाल्याची घटना गुरुवार दि २४ रोजी सकाळी उघडकीस आली. वरणगाव पोलीस स्टेशनला अकस्मात मृत्यूची नोंद करण्यात आली आहे.
किशोर काशिनाथ काळे (३६) असे मयत तरुणाचे नाव आहे. त्यांच्या पश्चात पत्नी, दोन मुले, आई, वडिल, दोन भाऊ असा परिवार आहे. शहरातील सिध्देश्वर नगर परिसरातील रहिवाशी किशोर काशिनाथ काळे हे मागील दोन दिवसापासून घरातून कोणास काही न सांगता निघुन गेला होता. त्यांच्या नातेवाईकांनी त्यांचा शोध घेतला असता कुणासही दिसला नाही.(केसीएन) गुरुवार दि. २४ रोजी सकाळी ८ वाजेच्या सुमारास शहरातील शेतकरी प्रविण भंगाळे यांच्या शेतात काम करण्यासाठी गेलेले शेत मजुर विहिरीवर पाणी घेण्यासाठी गेले होते.
तेव्हा त्यांना विहीराच्या पाण्यात मृतदेह आढळला. त्याला ग्रामस्थांनी बाहेर काढल्यानंतर तो किशोर काळे असल्याची ओळख पटली. याबाबत वरणगाव पोलीस स्टेशनला जितेंद्र काळे याच्या खबरीवरून वरणगाव पोलीस स्टेशनला अकस्मात मृत्यूची नोंद करण्यात आली आहे. घटनेचा तपास पोलीस करीत आहे.
