जामनेर शहरातील दुर्दैवी घटना ; खादगाव परिसरात हळहळ
जामनेर (प्रतिनिधी ) ;- जामनेर तालुक्यातील खादगाव येथून जामनेर येथे ललवणी शाळे जवळील स्टॉप जवळ उतरून क्लाससाठी जाण्यासाठी निघालेल्या एका १८ वर्षीय विद्यार्थिनीचा पुलावर तोल गेल्याने ती कांग नदीपात्रात वाहून गेल्याची दुर्दैवी घटना आज सकाळी ६ वाजेच्या सुमारास उघडकीस आली असून या घटनेमुळे परिसरात खळबळ उडून हळहळ व्यक्त होत आहे . पूनम ज्ञानेश्वर बाविस्कर वय १८ असे मृत मुलीचे नाव आहे .
पूनम हि आज सकाळी क्लासला जाण्यासाठी निघाली असता कांग नदीच्या पुलावरून जात असतांना शेजारून वाहने ये जा करत होती. पूनम ही पुलाच्या किनाऱ्याने जात होती . त्यावेळी तिचे लक्ष पाण्याच्या प्रवाहाकडे गेले असता तिला चक्कर आल्याने ती पुलावरून नदी पात्रात पडून वाहून गेली असे प्रत्यक्षदर्शी व्यक्तींकडून माहिती देण्यात आली.
घटनेची माहिती मिळताच तहसीलदार नाना साहेब आगळे व पोलीस निरीक्षक मुरलीधर कासार यांनी घटना स्थळी धाव घेऊन स्थानिकच्या नागरिकांच्या मदतीने शोध मोहीम सुरु केली व अवघ्या तीन तासात मुलीचा मृतदेह खादगाव जवळील नदीपात्रात काटेरी झुडपाजवळ अडकलेला आढळून आला . मयत पूनम बाविस्कर हिचा मृतदेह शवविच्छेदनासाठी जामनेर येथील उपजिल्हा रुग्णालयात दाखल करण्यात आला आहे.
मुलीचे आई वडील हे गरीब कुटुंबातील असून मोल मजुरी करून उदरनिर्वाह करतात एक भाऊ आणि एक बहीण असा परिवार आहे. दरम्यान या घटनेमुळे परिसरात हळहळ व्यक्त होत आहे. याबाबत पोलीस ठाण्यात नोंद करण्याचे काम सुरु होते.
