रावेर तालुक्यात खिर्डी खुर्द संस्थानात भाविकांचा उत्साह
रावेर (प्रतिनिधी) : ‘गोविंद.. गोविंद..’ च्या गजरात खिर्डी व परिसरातील महानुभाव पंथीयांचे श्रद्धास्थान असलेल्या श्रीकृष्ण मंदिर संस्थान खिर्डी खुर्द येथील संस्थानात पवितेपर्व काळास प्रारंभ झाला आहे.संस्थानातील श्री चक्रधर स्वामींच्या ८०० वर्षाच्या पूर्वी चरणांकित असलेली मूर्तीला पविते करण्यासाठी परिसरातील भाविकांची मांदियाळी जमली होती. महानुभाव पंथात ‘पवितेपर्व’ काळास विशेष महत्त्व आहे. गुरुपूजनाचे महत्त्व असलेल्या या पर्वात ‘गोविंद.. गोविंद’च्या नामघोषात भाविकांनी मूर्तीस विडा अवसर आणि गुंफलेले नारळ-सुपारी अर्पण करीत ‘पवितेपर्व’ प्रारंभ केले आहे.
शेकडो वर्षांची परंपरा लाभलेल्या या पर्व काळात शेकडो भाविक सहभागी होत देवाला सुताने गुंफलेले व आकर्षक सजविलेले नारळ अर्पण करतात. त्यास ‘विडा अवसर’ असे म्हणतात. श्रावण पौर्णिमेच्या पूर्वसंध्येला हा विधी होत असतो. याप्रसंगी आचार्य प्रवर महंत चोरमागे बाबा महानुभाव यांच्या मार्गदर्शनाखाली हा सोहळा पार पडला. दरवर्षी नारळी पौर्णिमेला तसेच चतुर्दशीला महानुभाव पंथात ‘पविते पर्व’ घरोघरी धार्मिक उत्सवाने साजरा करण्यात येते. जन्माष्टमीपर्यंत हा उत्सव तथा विधी सुरू असतो.
यानिमित्त नारळी पौर्णिमेपासून ते जन्माष्टमीपर्यंत संस्थानात आकर्षक सजावट करण्यात येते. तसेच उटी, उपहार, पूजा, भजन, कीर्तन आदी धार्मिक कार्यक्रम होतात. घरोघरी देवघराची सजावट आणि आरास करण्यात येते. याप्रसंगी प्रदीप महाराज, प्रभाकर कडू महाजन, सुधाकर महाजन, मधुकर महाजन, भागवत महाजन, बाळू महाजन, मुकेश नारखेडे, मुन्ना महाजन व परिसरातील सदभक्त मंडळी उपस्थित होते.
