पाचोरा तालुक्यातील लोहारा येथे उपमुख्य कार्यकारी अधिकारी यांची झाडाझडती
पाचोरा (प्रतिनिधी) तालुक्यातील लोहारा येथील ग्रामपंचायतच्या समस्यांबाबत ग्रामस्थांनी ग्रामविकास मंत्री गिरीश महाजन यांच्याकडे तक्रारी केल्या होत्या. यावर महाजन यांनी वरिष्ठ अधिकाऱ्यांना चौकशीसाठी पाठवण्याचा शब्द ग्रामस्थांना दिला होता. त्यानुसार दिनांक १४ ऑगस्ट रोजी जि.प. उपमुख्य कार्यकारी अधिकारी (ग्रा. पं.) अनिकेत पाटील, पाचोरा गटविकास अधिकारी स्नेहल शेलार, विस्तार अधिकारी राजेंद्र धस यांनी लोहारा ग्रामपंचायतला भेट देत ग्रामपंचायतच्या कारभाराची झाडाझडती घेतली.
अधिकाऱ्यांनी ग्रामस्थांच्या तक्रारीनुसार समस्यांची पाहणी करण्यासाठी प्रत्यक्ष पायी फिरून समस्या जाणून घेतल्या. यात कन्याशाळेच्या मागील अंगणवाडी क्रमांक ०२१३ या ठिकाणी भेट दिली. अंगणवाडी समोरच भले मोठे पाण्याचे डबके व घाणीचे साम्राज्य दिसून आले. याबाबत ग्राम प्रशासनाला वेळोवेळी कळवून देखील त्यांनी या समस्येकडे दुर्लक्ष केले.
या अंगणवाडीत ३ ते ६ या वयोगटातील लहान बालक अंगणवाडीत येत असतात. या घाणीच्या प्रकारामुळे बालकांच्या आरोग्याचा प्रश्न निर्माण होण्याचा प्रश्नच अधिकाऱ्यांच्या निदर्शनास आल्याने आठ दिवसात ही समस्या सोडवण्याच्या सूचना दिल्या. कन्या शाळेच्या एका बाजूला कंपाउंड नसल्याने व शाळेत शौचास बसत असल्याने तसेच मुक्त गुरे ढोरे फिरत असतात. त्याठिकाणी कंपाऊंड करण्याचे आदेश ग्रामपंचायातीला दिले.
तसेच शितला माता मंदिर परिसरात महिला शौचालयाची दुरावस्था, घाणीचे साम्राज्य याबाबत स्थानिक महिलांनी तक्रार करत ग्रामपंचायत दुर्लक्ष करत असल्याचे अधिकाऱ्यांना सांगितले. तसेच वेळोवेळी साफसफाई, स्वच्छता करण्याची मागणी महिलांनी केली. बाजार पेठ भागाची, परिसरातील अंगणवाडीची पाहणी केली. स्मशानभूमीची देखील पाहणी करीत साफसफाई करण्याच्या सूचना दिल्या.
महिला शौचालयाची दुरावस्था, म्हाडा कॉलनी रहिवाशांना मूलभूत सुविधा मिळण्यासाठी म्हाडाचे अधिकारी, विस्तार अधिकारी, ग्रामविकास अधिकारी, सरपंच यांच्या समवेत एकत्रित बैठक लावण्याच्या सूचना दिल्या. गावातील सर्व समस्यांचा सर्व्हे करून त्या तात्काळ सोडविण्याच्या सूचना दिल्या. आठ दिवसांनी पुन्हा भेट देणार असल्याचे मुख्य कार्यकारी अधिकारी अनिकेत पाटील यांनी सांगितले.
यावेळी पाहणी करतांना त्यांचेसमवेत गटविकास अधिकारी, विस्तार अधिकारी, ग्रामविकास अधिकारी गजानन काळे, सरपंच अक्षय जैस्वाल, उपसरपंच दिपक खरे, ग्रामपंचायत सदस्य कैलास चौधरी, संभाजी चौधरी, नंदू सुर्वे, दत्तात्रय व नागरिक मोठ्या संख्येने हजर होते.
