चोपडा तालुक्यातील वडती येथील घटना
जळगाव (प्रतिनिधी) : चोपडा तालुक्यातील वडती येथे राहत्या घराच्या अंगणामध्ये खेळत असलेल्या दहा वर्षीय मुलीला साप चावल्यामुळे तिची प्रकृती गंभीर झाल्यानंतर रुग्णालयात दाखल केले असता डॉक्टरांनी तिला तपासून मयत घोषित केले आहे. याप्रकरणी अडावद पोलीस स्टेशनला अकस्मात मृत्यूची नोंद करण्यात आली आहे.
कविता सुनील बारीला (वय १०, रा. वडती, ता. चोपडा) असे मयत बालिकेचे नाव आहे. ती गावात आई-वडील आणि परिवारासह राहते. दरम्यान शनिवारी दि. १० ऑगस्ट रोजी सकाळी तिला राहत्या घराच्या अंगणात खेळत असताना साप चावला. (केसीएन)कुटुंबीयांना लक्षात येताच त्यांनी तिला उपजिल्हा रुग्णालय, चोपडा येथे दाखल केले. तेथे वैद्यकीय अधिकारी डॉ. पवन पाटील यांनी तपासून तिला मयत घोषित केले.
यावेळेला कुटुंबीयांनी एकाच आक्रोश केला. दरम्यान अडावद पोलीस स्टेशन येथे अकस्मात मृत्यूची नोंद करण्यात आली आहे. पुढील तपास हेडकॉन्स्टेबल संजय धनगर करीत आहेत. बालिकेच्या मृत्यूमुळे वडती हळहळ व्यक्त होत आहे. दरम्यान, पावसाळ्याचे दिवस सुरु आहेत. विषारी साप निघण्याचे प्रमाण वाढत असल्याने नागरिकांनी काळजी घ्यावी, असे आवाहन “केसरी राज” तर्फे करण्यात येत आहे.
