पाचोरा तालुक्यात पिंपळगाव हरेश्वर येथे पोलिसांची कारवाई
जळगाव (प्रतिनिधी) : पाचोरा तालुक्यातील पिंपळगाव हरेश्वर येथे संशयास्पदरित्या फिरणाऱ्या महिंद्रा पिकअप वाहन चालकाला पोलिसांनी ताब्यात घेतले. चालकाची चौकशी केली असता त्याने हे वाहन छत्रपती संभाजीनगर येथून चोरी करून नेले असल्याबाबतची माहिती दिली. पिंपळगाव हरेश्वर पोलीस स्टेशनला गुन्हा दाखल करण्यात आला आहे.
शेख अरबाज शेख जलीम (वय २०, रा. फाजीलपुरा, जि. छत्रपती संभाजीनगर) असे अटक करण्यात आलेल्या संशयित आरोपीचे नाव आहे. त्याच्या ताब्यातून महिंद्रा पिकअप वाहन (एम एच ४६ ई ४३५३) जप्त करण्यात आली आह. (केसीएन)हे वाहन हर्सूल जि. संभाजीनगर येथून चोरी करून तो पाचोरा तालुक्यात फिरत होता. या वाहन चोरीबाबत छत्रपती संभाजी नगर शहरातील बेगमपुरा पोलीस स्टेशन येथे गुन्हा दाखल आहे. पिंपळगाव हरेश्वर गावामध्ये माळी समाज मंगल कार्यालय परिसरात या वाहनाला पोलिसांनी थांबवले.
सुरुवातीला त्याने उडवाउडवीची उत्तरे दिली. मात्र अधिक चौकशी केली असता वाहन चोरीचा प्रकार उघडकीस आला. सदरची कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक कविता नेरकर, डीवायएसपी धनंजय येरुळे, पिंपळगाव हरेश्वर पोलीस स्टेशनचे सपोनी प्रकाश काळे यांच्या मार्गदर्शनाखाली पोहेका अतुल पवार, दीपक पाटील, अमोल पाटील, अभिजीत निकम आदींनी केली आहे. पुढील तपास अतुल पवार करीत आहेत.
