जामनेर तालुक्यातील पहुर पोलीस स्टेशनची कारवाई
जामनेर (प्रतिनिधी) : बचत गटाच्या महिलांना बँकेकडून कर्ज व इन्शुरन्स मंजूर करण्याच्या नावाखाली एका संशयित आरोपीने शेकडो महिलांना लाखो रुपयांचा चुना लावल्याचा प्रकार दोन दिवसांपूर्वी उघडकीस आला होता. याप्रकरणी एका महिला बचत गटाच्या अध्यक्षांनी तक्रार दाखल केल्यानंतर पहूर पोलिसांनी अत्यंत शिताफीने चाळीसगाव तालुक्यातून शनिवारी रात्री उशिरा एकाला अटक केली. न्यायालयात हजर केल्यानंतर त्यास दोन दिवसांची पोलीस कोठडी सुनावण्यात आली.
अनिल यादव पंडित (४६, सायगाव, ता.चाळीसगाव, ह.मु.आमखेडा, ता.सोयगाव, जि.संभाजीनगर) असे अटकेतील संशयित आरोपीचे नाव आहे. अनिल पंडितने बचत गटाच्या महिलांना बँकेकडून कर्ज व इन्शूरन्स मंजूर करण्याची थाप मारत त्यांच्याकडून प्रत्येकी एक हजार ते दिड हजार रुपये उकळले होते.(केसीएन) याप्रकरणी पहूर पोलिसात सीमा दीपक बारी (वय ३०, रा.वाडीदरवाजा, शेंदुर्णी, ता.जामनेर) यांनी तक्रार दिली होती.
त्यावरून संशयित आरोपी अनिल यादव पंडितविरोधात गुन्हा दाखल करण्यात आला. संशयिताने दिनांक १७ जुलैला सकाळी तक्रारदाराच्या घरी जात फसवणूक केली. तसेच संगीता आत्माराम बारी, अन्य बचत गट सदस्यांची फसवणूक केल्याने संशयिताला पोलिसांनी शनिवारी रात्री उशिरा अटक केली. (केसीएन)अधिक तपास पोलीस निरीक्षक सचिन सानप यांच्या मार्गदर्शनाखाली पोलीस उपनिरीक्षक भरत दाते करीत आहेत.
