एरंडोल तालुक्यातील जवखेडा परिसरातील घटना
एरंडोल (प्रतिनिधी) : तालुक्यातील जवखेड्याकडून एरंडोलकडे भरधाव वेगाने येणाऱ्या पांढऱ्या रंगाच्या अज्ञात कारने दुचाकीला समोरून कट मारल्याने दुचाकी रस्त्यावर खाली कोसळली. त्यात दुचाकीवर मागे बसलेल्या महिला जागीच ठार झाल्या. तर दुचाकीचालक तरुण जखमी झाला. ही घटना दि.२८ जुलै रोजी दुपारी १२.३० वाजेच्या सुमारास एरंडोल जवखेडा रस्त्यावर पाटाजवळ घडली. या प्रकरणी एरंडोल पोलीस स्टेशनला घटनेची नोंद घेण्यात आली आहे.
दुर्गेश अरूण देशमुख (वय २१) हा दुचाकीने त्याची आई सुनीताबाई अरूण देशमुख (वय ४८ वर्षे, रा. माळीवाडा, एरंडोल) यांना घेऊन शेतीकामासाठी शेतात जात होता. एमएच-१९-डीसी-८४१५ या क्रमांकाच्या दुचाकीने जवखेड्याकडून भरधाव वेगाने अज्ञात कारचालकाने दुचाकीला कट मारला.(केसीएन)त्यात दुचाकी घसरली. यात सुनीताबाई देशमुख यांच्या डोक्याला जबर मार लागला. त्या जागीच गतप्राण झाल्या.
त्यांना रुग्णालयात दाखल केले असता तेथे वैद्यकीय अधिकाऱ्यांनी मयत घोषित केले डोळ्यासमोर आईचा अपघाती मृत्यू झाल्याने मुलाने आक्रोश केला. (केसीएन)एरंडोल पोलीस स्टेशनला घटनेची नोंद घेण्याचे काम सुरू होते. पोलीस निरीक्षक सतीश गोराडे यांच्या मार्गदर्शनाखाली पोलीस नाईक मुकेश अमोदकर, हेडकॉन्स्टेबल राजेश पाटील व अनिल पाटील तपास करीत आहे.
