मुक्ताईनगर तालुक्यातील वडोदा येथील घटना
जळगाव (प्रतिनिधी) : मुक्ताईनगर तालुक्यातील वडोदा येथे एका १४ वर्षीय मुलीने राहत्या घरी विषारी औषध घेऊन आत्महत्या करण्याचा प्रयत्न केला होता. तिला जळगाव येथील शासकीय वैद्यकीय महाविद्यालय व रुग्णालयात उपचार सुरू असताना शनिवारी दि. २६ जुलै रोजी सकाळी मृत्यू झाला आहे. याप्रकरणी जिल्हा पेठ पोलीस स्टेशनला अकस्मात मृत्यूची नोंद करण्यात आली आहे.
प्रिया नागार्जुन खरगे (वय १४, रा.वडोदा ता. मुक्ताईनगर) असे मयत बालिकेचे नाव आहे. ती वडोदा येथे आई, वडील, दोन भाऊ यांच्यासह राहत होती. प्रियाचे वडील नागार्जुन हे शेती काम करून परिवाराचा उदरनिर्वाह करीत आहेत.(केसीएन) प्रिया खर्गे ही गावातील जिल्हा परिषदेच्या शाळेत इयत्ता नववीत शिकत असल्याची माहिती मिळाली. दरम्यान रविवारी दि. २१ जुलै रोजी राहत्या घरी असताना तिने काहीतरी विषारी औषध पिऊन आत्महत्या करण्याचा प्रयत्न केला.
कुटुंबीयांच्या लक्षात येत असताच तातडीने तिला जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल केले. या ठिकाणी अतिदक्षता विभागात तिच्यावर गेल्या पाच दिवसापासून उपचार सुरू होते. (केसीएन)दरम्यान शुक्रवारी दि. २६ जुलै रोजी सकाळी उपचार सुरू असताना तिचा मृत्यू झाला आहे. यावेळी कुटुंबीयांनी मन हेलावणारा आक्रोश केला. यावेळी जिल्हापेठ पोलीस स्टेशनच्या कर्मचाऱ्यांनी अकस्मात मृत्यूची नोंद केली आहे. दरम्यान १४ वर्षीय अल्पवयीन विद्यार्थिनीच्या मृत्यूमुळे वडोदा गावात शोककळा पसरली आहे.
