जळगाव शहरातील समता नगर येथील घटना
जळगाव (प्रतिनिधी) : शहरातील समता नगरातील तरूणाचा एका विहीरीत मृतदेह तरंगतांना आढळून आल्याने खळबळ उडाली आहे. त्याने विहिरीत उडी घेऊन आत्महत्या केल्याचा प्राथमिक अंदाज व्यक्त केला जात आहे. शासकीय वैद्यकीय महाविद्यालयात नातेवाईक, मित्रांनी एकच गर्दी केली होती. रामानंद नगर पोलीस स्टेशनला अकस्मात मृत्यूची नोंद करण्यात आली आहे.
सोनू राजू बनसोडे (वय २७ रा. समता नगर, जळगाव) असे मयत तरूणाचे नाव आहे. सोनू बनसोडे हा तरूण आई व बहिण यांच्यासोबत समता नगरातील बौध्द वाडा येथे वास्तव्याला होता. मंगळवारी दि. २३ जुलै रोजी रात्री ११ वाजता बाहेर जात असल्याचे सांगून सोनू हा घराबाहेर निघून गेला.(केसीएन)रात्रीपर्यंत तो घरी आला नाही. त्यामुळे त्याच्या आईने शोधाशोध करण्यास सुरूवात केली. बुधवारी २४ जुलै रोजी सकाळी ७ वाजता समता नगरातील बौध्दवाडा येथील विहिरीत चपला तरंगतांना दिसून आले.
या चपला सोनूच्याच असल्याचे त्याच्या आईने ओळखले. त्यानुसार पट्टीचे पोहणाऱ्याने विहिरीत उडी घेऊन पहिल्याच प्रयत्नात सोनू याला बाहेर काढले. मुलाचा मृतदेह पाहताच त्याच्या आईने एकच आक्रोश केला. (केसीएन) दरम्यान, परिसरातील तरूणांनी मृतदेह शासकीय वैद्यकीय महाविद्यालयात दाखल करण्यात आला. सोनूने विहिरीत उडी घेवून आत्महत्या केली असावी असा अंदाज व्यक्त केला जात आहे. यावेळी रूग्णालयात नातेवाईकांसह मित्रपरिवाराची मोठी गर्दी होती. रामानंद नगर पोलीस स्टेशनला अकस्मात मृत्यूची नोंद करण्यात आली आहे.
