मुक्ताईनगरला पंचक्रोशीतील भाविकांची उपस्थिती
मुक्ताईनगर (प्रतिनिधी) : अंतर्धान समाधी सोहळा साजरा झाल्यावर आईसाहेब मुक्ताईंना आलेला थकवा क्षीण घालवण्यासाठी प्रक्षाळ पूजा करण्यात आली. शुक्रवारी सकाळी ८ वाजेपासून ते १० वाजेपर्यंत महाआरती व पूजा अभिषेक करून संपन्न झाली. सदरील प्रक्षाळ पूजा संत मुक्ताबाई संस्थानचे अध्यक्ष अॅड. रवींद्र पाटील यांच्या हस्ते पार पडली.
प्रसंगी संत मुक्ताई पालखी सोहळा प्रमुख रवींद्र हरणे महाराज, मूळ मंदिर व्यवस्थापक उद्धव जुणारे महाराज, राम जुनारे, विनायक व्यवहारे, दुर्गा मराठे, कल्पना हरणे, गीता जुनारे, गणेश आढाव यांच्यासह असंख्य भाविक उपस्थित होते. २५ मे ते ४ जूनपर्यंत संत मुक्ताई अंतर्धान समाधी सोहळा उत्साहात साजरा झाला. हजारो भाविकांनी या अकरा दिवसात दर्शन घेतले. यात्राकाळात मंदिर २४ तास खुले ठेवण्यात आले होते. भाविकांच्या दर्शनाचे गर्दीने मुक्ताईस आलेला थकवा क्षीण घालवण्यासाठी प्रक्षाळ पूजा करण्याची परंपरा आहे. प्रक्षाळ पूजेचे दोन भाग असतात.
उपस्थितांकडून मंदिर गाभारा व परिसर स्वच्छ करतात. विविध औषधी काढे तयार करून अभिषेक केला जातो. यावेळी भाविक मूर्तीला साखर लिंबू लावतात. आरतीनंतर पुरणपोळी नैवेद्य दाखवतात. यावेळी भाविकांनी प्रक्षाळ पूजेस उपस्थित राहून मुक्ताई चरणी सेवा रुजू केली. दिवसभरात मुक्ताईनगर पंचक्रोशीतील भाविकांनी दर्शन घेतले.
