भुसावळ तालुक्यातील घटना
भुसावळ (प्रतिनिधी) : जळगाव जिल्ह्यात सोमवारी दि. ३ जून रोजी आलेल्या जोरदार वादळी वाऱ्यामुळे तालुक्यातील वांजोळा-साकेगाव रस्त्यावर असलेल्या शेतशिवारातील झोपडी पडून त्यात मजुराचा मृत्यू झाल्याची घटना मध्यरात्री घडली.
गिरधर बजरंग भिल (वय ५५) असे मृताचे नाव आहे. किशोर देवराम सावळे यांच्या वांजोळा शिवारातील शेतात गिरधर बजरंग भिल हे झोपडी टाकून राहत होते. सोमवारी दि. ३ जूनच्या रात्री अचानक वारा वादळ व पाऊस सुरू झाला. या वादळी पावसाने झोपडी पडून त्याखाली दबल्याने गिरधर भिल यांचा गुदमरून मृत्यू झाला. ही घटना पहाटे ५ वाजता लक्षात आली. त्यानंतर वांजोळा येथील ग्रामस्थांनी गिरधर भिल यांचा मृतदेह ट्रामा सेंटर, भुसावळ येथे नेला. घटनेची माहिती मिळताच शेतात नातेवाइकांनी आक्रोश केला. या प्रकरणी संबंधित पोलीस स्टेशनला घटनेची नोंद करण्यात आली आहे.
