अप्पर पोलीस अधीक्षकांची माहिती
एकाला धुळ्यातून तर दुसऱ्याला भुसावळातून घेतले ताब्यात
भुसावळ (प्रतिनिधी) : शहरातील माजी नगरसेवक संतोष बारसे आणि सामाजिक कार्यकर्ते सुनील राखुंडे यांची बुधवारी रात्री गोळ्या घालून हत्त्या करण्यात आली होती. गुरुवारी याप्रकरणी माजी नगरसेवकसह ८ जणांविरुद्ध गुन्हा दाखल करण्यात आला आहे. यातील राजू सूर्यवंशी आणि विनोद चावरिया यांना पोलिसांनी ताब्यात घेतले असल्याची माहिती अपर पोलीस अधीक्षक अशोक नखाते यांनी “केसरीराज”ला दिली.
भुसावळ शहरातील जुना सातारा परिसरात असलेल्या मरीमाता मंदिराजवळ बुधवारी रात्री ९.३० वाजेच्या सुमारास चारचाकीने जात असलेल्या माजी नगरसेवक संतोष बारसे आणि सामाजिक कार्यकर्ते सुनील राखुंडे यांच्यावर अज्ञात हल्लेखोरांनी गोळीबार करीत खून केला होता.
गुरुवारी सकाळी मिथुन बारसे यांनी दिलेल्या फिर्यादीनुसार माजी नगरसेवक राजू सुर्यवंशीसह शिव पथरोड, विष्णू पथरोड, विनोद चावरिया, सोनू पंडीत, टकरन पथरोड, नितीन पथरोड, बंटी पथरोड यांच्यासह २-३ अनोळखी इसमविरुद्ध भुसावळ शहर पोलीस ठाण्यात गुन्हा दाखल करण्यात आला आहे.
घडलेल्या घटनेनंतर दोघांचे मृतदेह जळगाव जिल्हा रुग्णालयात आणण्यात आले होते. संपूर्ण जिल्हा पोलीस प्रशासन संशयितांच्या शोध घेत होते. दरम्यान, संशयीत आरोपी राजू सूर्यवंशी हा चारचाकी वाहनाने गुजरात जात असताना त्याला साक्री जि.धुळे येथे एका हॉटेलवरून धुळे पोलिसांनी ताब्यात घेतले आहे. त्याला उद्या शुक्रवारी भुसावळ येथे आणण्यात येणार आहे. तसेच विनोद चावरिया याला भुसावळ शहर पोलिसांनी ताब्यात घेतले आहे.
मयत माजी नगरसेवक संतोष बारसे आणि सुनील राखुंडे यांच्या मृतदेहाचे शवविच्छेदन केल्यानंतर दुपारी ५.३० वाजेच्या सुमारास मृतदेह भुसावळ येथे घेऊन जाण्यात आला.
