यावल तालुक्यातील डांभुर्णी परिसरातील घटना
जळगाव (प्रतिनिधी) :- यावल तालुक्यातील डांभुर्णी ते चिंचोली रस्त्यावर भरधाव दुचाकी अचानक घसरल्याने दुचाकीवरील तरुणाचा मृत्यू झाला असून दोन जण गंभीर जखमी झाले आहेत. हा अपघात शुक्रवारी दि.१५ मार्च रोजी दुपारी १ वाजता झाला. याप्रकरणी यावल पोलीस स्टेशनला घटनेची नोंद करण्याचे काम सुरु होते.
सागर संजय बाविस्कर (वय २७, रा. डांभुर्णी ता. यावल) असे मयत तरुणाचे नाव आहे. तो आई, वडील, भाऊसोबत डांभुर्णीत राहत होता. शेतीकाम करून घराच्या आर्थिक गाड्याला हातभार लावत होता. शुक्रवारी दि. १५ मार्च रोजी दुपारी साडेबारा वाजता सागर बाविस्कर त्याचे दोन मित्र योगेश विठ्ठल कोळी (वय ३५) आणि चेतन सुधाकर सोनवणे (वय ३४, दोघे रा. डांभुर्णी ता. यावल) यांच्यासह चिंचोलीहून डांभुर्णी येथे जात असताना त्यांची दुचाकी घसरून भीषण अपघात झाला. यावेळी आजूबाजूच्या ग्रामस्थांनी त्यांना तातडीने जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल केले.
तेथे वैद्यकीय अधिकाऱ्यांनी सागर बाविस्कर याला तपासून मयत घोषित केले. यावेळी सागरच्या कुटुंबीयांनी व नातेवाईकांनी यावेळी आक्रोश केला होता. तर योगेश कोळी व चेतन सोनवणे हे गंभीर जखमी झाले आहेत. त्यांच्यावर शासकीय वैद्यकीय महाविद्यालय व रुग्णालयात उपचार सुरु आहेत. दरम्यान, पोलिसांना माहिती मिळताच त्यांनी घटनास्थळी धाव घेतली. याप्रकरणी यावल पोलीस स्टेशनला घटनेची नोंद करण्याचे काम सुरु होते.
