सायबर पोलीस स्टेशनचा यशस्वी तपास
जळगाव (प्रतिनिधी) :- विम्यावर अधिक बोनस व मेडिकल कव्हर मिळवून देण्याचे अमिष दाखवत एका तरुणाला ८ लाख ९५ हजार ६४६ रुपयांमध्ये फसवणूक केल्याप्रकरणी दाखल गुन्ह्यात जळगाव सायबर पोलिस स्टेशनच्या कर्मचाऱ्यांनी प्रगती केली आहे. मागील महिन्यात दिव्यांग तरुणासह त्याच्या मावसभावाला गोवा राज्यातून अटक केली होती. आता त्यात अधिक तपास होऊन यातील तिसरा संशयित आरोपी उत्तर प्रदेशातील गाजियाबाद येथून अटक केला आहे.
तक्रारदार पुरुषाला त्याच्या इन्शुरन्स पॉलिसीवर बोनस रक्कम मिळवून देऊ असे सांगून तसेच त्यांच्यासह त्यांच्या पत्नीला मेडिकल कव्हरचे आमिष दाखवून त्यांना बनावटीकरण केलेले बॉण्ड पेपर व इन्कम टॅक्सचे प्रमाणपत्र व्हाट्स अपद्वारे पाठविले होते. त्यांच्याकडून वेळोवेळी ८ लाख ९५ हजार ६४६ रुपये घेतले. मात्र कुठलीही रक्कम न देता आर्थिक फसवणूक केली होती. त्यानुसार डिसेंबर महिन्यात दाखल झालेल्या या गुन्ह्याचा तपास सुरू होता. तपासात पणजी, मडगाव येथील एटीएममधून सदर खात्यावरून रक्कम काढल्याचे समजले होते.
त्यामुळे संबंधित बँकेकडून तेथील सीसीटीव्ही फुटेज मागवण्यात आले. त्यातून निष्पन्न होऊन गोव्यातून अवदेशकुमार रामकिशोर (वय २४) व रामप्रसाद लल्लू निशाद (२५, रा. उत्तर गोवा) यांना गोवा अटक करण्यात आली होती. गोवा येथून अटक केलेल्या दोघांकडून मोबाईल, सिमकार्ड, चेकबुक, डेबिट कार्ड व इतर साहित्य हस्तगत करण्यात आले आहे. संशयित रामप्रसाद हा दिव्यांग असूनही त्याने मावसभाऊ अवदेशकुमार याच्यासह हा गुन्हा केला आहे.
गुन्हयाचे तपासात प्राप्त माहितीचे आधारे निष्पन्न आरोपीतांना अटक करणेकामी पोउपनि दिगंबर थोरात यांचे सोबत पोहेका/ प्रविण वाघ, पोहेकों/राजेश चौधरी, पोहेको/ दिलीप चिचोले व पोकों दिपक सोनवणे अशांना उत्तरप्रदेश राज्यातील गाझियाबाद येथे रवाना करण्यात आले होते. सदर पथकाने प्राप्त माहितीचे आधारे आरोपीतांचा ठावठिकाणाबाबत शोध घेवुन गुन्हयाचे तपासात संशयित आरोपी सौरभ प्रमोदकुमार शर्मा (वय-३०, गुलधार-२, गाझीयाबाद, उत्तरप्रदेश) यांस अटक करुन त्याचे ताब्यातुन मोबाईल, सीमकार्ड असे जप्त करण्यात आले आहे.
नागरीकांना जाहीर आवाहन
सायबर पोलीस स्टेशन जळगाव कडून जिल्ह्यातील नागरीकांना आवाहन करण्यात येत आहे की, पॉलिसी म्यँचुअर झाली आहे, त्यावर अधिक बोनस मिळेल, मेडीक्लेम सुविधा मिळतील अशा प्रकारचे मेसेज/ कॉल यावर विश्वास ठेवुन कोणतीही रक्कम भरु नये. तसेच स्वतः चे नावाचे बँक खाते तसेच बँक खात्याची माहिती इतर कुणालाही देवु अथवा शेअर करु नये, त्याचप्रमाणे अनोळखी व्यक्तींना आपले आधारकार्ड, पॅनकार्ड, ई-मेल आयडी ची माहिती शेअर करु नये. तसेच आपणास कोणी बँक खाते उघडुन कमीशन बेसवर वापरण्यास मागत असेल तर आपण तात्काळ सायबर पोलीस स्टेशन येथे संपर्क करावा. तसेच सायबर फ्रॉड झाल्यास तात्काळ 1930 या टोल फ्रि क्रमांकावर संपर्क करावा अथवा Cybercrime.gov.in यावर ऑनलाईन तक्रार नोंदवावी.
