जळगाव तालुक्यातील मन्यारखेडा फाट्यावरील घटना
जळगाव (प्रतिनिधी) :- अचानक समोर आलेला खड्डा चुकवताना दुचाकी घसरल्याने मागे बसलेले साजिदखान सईदखान (३०, रा. टागोरनगर, जळगाव) हे गंभीर जखमी झाले. हा अपघात ७ फेब्रुवारी रोजी मन्यारखेडा फाट्याजवळ झाला होता. या प्रकरणी शुक्रवार, ९ फेब्रुवारी रोजी नशिराबाद पोलिस ठाण्यात दुचाकीचालकाविरुद्ध गुन्हा दाखल करण्यात आला आहे.
साजिदखान हे एका जणासोबत दुचाकीने जळगावला येत होते. ही दुचाकी मन्यारखेडा फाट्याजवळ आली. त्या वेळी समोर अचानक खड्डा आल्याने चालकाने तो चुकवण्याचा प्रयत्न केला. त्यात दुचाकी घसरली व मागे बसलेले खान यांचा हात फॅक्चर होऊन गंभीर दुखापत झाली. या प्रकरणी खान यांनी नशिराबाद पोलिस ठाण्यात फिर्याद दिली. त्यावरून दुचाकीचालकाविरुद्ध गुन्हा दाखल करण्यात आला आहे. पुढील तपास सहाय्यक फौजदार रवींद्र तायडे करत आहेत.
