भरदिवसाची घटना
बोदवड प्रतिनिधी) :- शहरातील जामठी दरवाजा भागातील प्रभाग क्रमांक ९ मध्ये भरदिवसा चोरटयांनी घरफोडी केली. चोरटयांनी सव्वा ४ लाखांचा ऐवज लांबविला असून हि चोरी गुरुवार दि. २५ रोजी सकाळी १० नंतर घडली. बोदवड पोलीस स्टेशनला गुन्हा दाखल करण्यात आला आहे.
शहरातील जामठी दरवाजा भागात रामधन नामदेव चापोरकर (वय ४५) हे शेतकरी कुटूंबासह वास्तव्यास आहेत. गुरुवार २५ रोजी सकाळी १० नंतर चापोरकर यांच्या घरात भर दिवसा चोरटयांनी प्रवेश केला. घरातील लाकडी पेटीतील रोकड तसेच १४ हजार रुपये किंमतीच्या तीन ग्रॅम वजनाचे सोने असा एकूण ४ लाख १४ हजार रुपयांचा ऐवज लांबवला.
चोरीचा प्रकार लक्षात आल्यानंतर चापोरकर यांना बोदवड पोलिसांना माहिती दिली. जळगाव येथून श्वान पथकाला पाचारण करण्यात आल्याने श्वानाने जामठी रोड पर्यंतचा रस्ता दाखवला व श्वान घुटमळले. बोदवड पोलिस स्टेशनमध्ये चापोरकर यांनी फिर्याद दिल्यानंतर अज्ञात चोरट्यांविरोधात गुन्हा दाखल करण्यात आला. तपास हवालदार विनोद श्रीनाथ करीत आहे.
