तिन्ही मंत्र्यांसह जिल्हाधिकाऱ्यांचे गंभीर दुर्लक्ष, २२ जानेवारीपासून अन्न त्याग उपोषण
जळगाव (प्रतिनिधी) – महिला व बालविकास विभाग यांच्या कडे अत्यंत गंभीर स्वरुपाची तक्रार दि. २९ रोजी सादर करण्यात आली आहे. बाल न्याय (मुलांची काळजी व संरक्षण) अधिनियम २०१५ कलम २७ प्रमाणे बाल कल्याण समिती, जळगांव कार्यरत आहे. मात्र या समितीतील अध्यक्ष व सदस्यांवर पॉक्सो कायद्यांतर्गत गुन्हा दाखल आहे. तरीही त्यांना अटक व निलंबन झालेले नाही. त्यांना जिल्ह्यातील तिघी मंत्र्यांसह जिल्हाधिकाऱ्यांनी अभय दिले आहे काय असा प्रश्न निर्माण झाला आहे. याकरिता साखळी उपोषण सुरु झाले असून उपोषणकर्त्यानी २२ जानेवारीपासून अन्नत्याग करणार असल्याचे सांगितले आहे.
वृत्तपत्रातील प्रसिद्ध झालेल्या बातम्या नुसार सदर जळगाव च्या बाल कल्याण समितीतील तीन पदाधिकाऱ्यांवर गुन्हा दाखल होऊन सदर सदस्यांची राज्य चौकशी समितीद्वारे ऑगस्ट – २०२३ महिन्यातच चौकशी पुर्ण झालेली आहे. खडके बालगृहाची अत्याचार प्रकरणी एरंडोल पोलीस स्टेशन ता. एरंडोल जि. जळगाव येथे दिनांक २६.०७.२०२३ रोजी गुन्हा दाखल झालेला आहे. खडके बालगृह अत्याचार प्रकरणाची माहिती पिडितांनी अध्यक्ष व दोन सदस्य बाल कल्याण समिती, जळगाव यांना सर्वप्रथम दिली होती. एरंडोल पोलीस स्टेशन येथे गुन्हा दाखल होण्याच्या ६ महिने अगोदर या संपूर्ण प्रकरणाची माहिती पिडितांनी बाल कल्याण समिती अध्यक्ष व सदस्य अध्यक्ष देवयानी गोविंदवार, सदस्य विद्या बोरनारे, सदस्य संदिप पाटील यांना घटनाक्रम माहिती होता.
सदर व्यक्तींवर दाखल गुन्ह्याचा तपशील – भा. द. वि. कलम ३२४,३५४,३७६(२)(n)(क),३२३,५०६, पोस्को कायदा २०१२ अंतर्गत ४,५(फ) (एल) (ओ) ,६,८,९(फ)(एल)(ओ) ,१९,२१,८२ प्रमाणे गुन्हा दाखल आहे. जळगाव जिल्ह्यातील खडके, ता. एरंडोल येथे संस्थेच्या माध्यमातून खाजगी रित्या चालवल्या जाणाऱ्या कै. य. ब. पाटील, मुलींचे बालगृह, खडके येथील मुलींच्या बालगृहात लैंगिक शोषणाची गंभीर स्वरुपाची घटनेची तक्रार बाल कल्याण समिती, जळगाव येथील तीन अध्यक्ष /सदस्य, अध्यक्ष श्रीमती देवयानी गोविंदवार, सदस्य श्रीमती विद्या बोरनारे व सदस्य श्री. संदीप पाटील यांना पिडीत बालिकांनी ऑगस्ट २०२२ मध्ये सर्व प्रथम सांगितली होती.
ज्या बाल कल्याण समितीतील अध्यक्ष व सदस्य यांना या समितीवर पिडीत बालकांना न्याय मिळवून देण्यासाठी नियुक्त केलेले असतांना अशा प्रकारे अतिशय गंभीर स्वरुपाची लैंगिक शोषण व अत्याचाराची घटना यांना माहिती होऊन देखील यांनी याची दखल घेऊन संबंधित आरोपींवर गुन्हा दाखल केला नाही यावरुन यांच्या कामाची तत्परता व बालकांबाबत असलेली सहानुभूती स्पष्ट होते. तसे पाहता या अध्यक्ष महोदय व दोन सदस्य यांच्यावर गुन्हा दाखल झालेला असतांना यांच्या कामाचा सर्व भोगंळ कारभार जगजाहीर झालेला आहे तरीही अद्याप यांची येथुन हकालपट्टी का होत नाही ? हा मात्र सर्वांसाठीच संशोधनाचा विषय ठरला आहे.
पोक्सो अतंर्गत सर्व प्रथम गुन्ह्याची माहिती असतांना देखील त्याचवेळी गुन्हा दाखल न करता आरोपीची पाठराखण करत सदर बाब अनेक दिवस दाबुन ठेवणाऱ्या महाशय असणारे बाल कल्याण समिती अध्यक्ष – देवयानी गोविंदवार, सदस्य विद्या बोरणार, सदस्य – संदिप पाटील या तिनही महाशयांचे तात्काळ निलबंन करण्यात यावे. बाल कल्याण समितीतील अध्यक्ष /सदस्य ही समिती तात्काळ बरखास्त करण्यात यावी. या तीन महाशयांना या पुढे शासनस्तरावर कोणत्याही शासकीय समितीच्या सदस्य पदी नियुक्ती करण्यात येवु नये. या तीन महाशयांना बालकल्याण समिती येथे येण्यास प्रतिबंध करण्यात यावा.
या तिन महाशयांनी पदाचा गैरवापर केलेला आहे, त्यामुळे बाल कल्याण समितीतील अध्यक्ष व दोन सदस्य यांना बालकल्याण समितीच्या पदावरुन तात्काळ पदमुक्त करण्यात यावे. सदर गुन्हे दाखल असलेल्या बाल कल्याण समितीच्या पदाधिकाऱ्यांच्या बरखास्तीची कार्यवाही होण्यास टाळाटाळ होत आहे त्यामुळे नाईलाजास्तव आम्हाला बेमुदत साखळी उपोषण करण्याऐवजी अन्न त्याग उपोषण सुरू करावे लागत आहे याची आपण कृपया नोंद घ्यावी तसेच आपण जोपर्यंत सदर समितीतील अध्यक्ष व दोन सदस्य यांना निलंबित करित नाहीत तोपर्यंत आमचे अन्न त्याग उपोषण सुरू राहणार आहे याची आपण व आपल्या महिला व बालविकास विभागाने नोंद घ्यावी.
सदर तक्रारीची गांभिर्याने दखल घेण्याची विनंती महाराष्ट्र स्टुडंट्स युनियनच्या वतिने करण्यात आली होती. प्रशासनाने अद्याप ही तक्रारीची दखल घेतलेली नसल्या कारणाने दिनांक १९/०१ /२०२४ पासुन बेमुदत साखळी उपोषण सुरु करण्यात आले आहे. तीन दिवस उलटुन गेलेत तरी देखील राज्य शासनाने कोणतीही दखल न घेतल्याने आम्ही दिनांक २२/०१/२०२४ रोजी सकाळी ९:०० वाजेपासून अन्न त्याग उपोषण करणार आहोत असे महाराष्ट्र स्टुडंट्स युनियनचे राज्य उपाध्यक्ष ॲड. दिपक अरुण सपकाळे यांनी निवेदनाद्वारे प्रशासनाला कळविले आहे.
