जळगावातील घटना, सायबर पोलीस ठाण्यात गुन्हा दाखल
जळगाव (प्रतिनिधी) :- विमा कंपनीकडून बोनस व मेडिकल कव्हरची रक्कम मिळवून देण्याचे अमिष दाखवत जळगाव शहरातील तरुणाची सुमारे ९ लाखात फसवणूक करण्यात आल्याची घटना उघडकीस आली आहे. या प्रकरणी सायबर पोलीस ठाण्यात गुन्ह्याची नोंद करण्यात आली आहे.
योगेश मधुकर काळे (४३, रा. विठ्ठलपेठ, जळगाव) यांनी फिर्याद दिली आहे. योगेश काळे हे खासगी नोकरी करतात. त्यांच्याशी आशिष जैन, दिनेश चतुर्वेदी, गोपाल क्रिशन, जितेंद्र सिंह रंधावा असे नावे सांगणाऱ्या चौघांनी १८ डिसेंबर ते २२ डिसेंबर दरम्यान वारंवार संपर्क साधला. विमा कंपनीकडून बोनस व मेडिकल कव्हरची रक्कम मिळवून देतो असे सांगत त्यांना एका कंपनीचा १०० रुपये किंमतीचा बनावट बाँड, आयकरचे प्रमाणपत्र व्हॉटसअॅपवर पाठवून त्यांचा विश्वास संपादन केला.
काळे यांच्याकडून वेळोवेळी आठ लाख ९५ हजार ६४६ रुपये घेतले. बरेच दिवस झाले तरी कोणताही मोबदला मिळत नसल्याने आपली फसणूक झाल्याचे लक्षात आल्यानंतर काळे यांनी सायबर पोलिस ठाण्यात फिर्याद दिली. त्यावरून चौघांविरुद्ध गुन्हा दाखल करण्यात आला आहे. पुढील तपास पोलिस निरीक्षक किसन नजन पाटील करीत आहेत.
