जयपूर येथे हृदयविकारावर सुरु होते उपचार
जळगाव (प्रतिनिधी) :- चोपडा तालुक्यातील मोरचीडा गावातील जवानाचा राजस्थानमधील जयपूर येथे कर्तव्यावर असताना हृदयविकाराचे उपचार सुरु असताना मृत्यू होऊन ते शहीद झाले. त्यांच्यावर शासकीय इतमामात त्यांच्या गावी अंत्यसंस्कार करण्यात आले.
विकास नाना भादले (वय ४३, रा. मोरचीडा पो. उमर्टी ता. चोपडा) असे शहिद सैनिकाचे नाव आहे. ते गावी आई, पत्नी, १ मुलगा, १ मुलगी यांच्यासह राहत होते. २००१ पासून गेली २३ वर्षे ते सैन्यात होते. त्यांची ड्युटी राजस्थानातील जयपूर येथे होती. तेथे कर्तव्यावर असताना त्यांना हृदयविकार झाला. रुग्णालयात उपचार सुरु असताना त्यांना हृदयविकाराचा झटका आला व त्यातच ते शहीद झाले.
त्यांचे पार्थिव गावाकडे आणण्यात आले. शनिवारी त्यांच्यावर शासकीय इतमामात अंत्यसंस्कार करण्यात आले. यावेळी माजी आ. चंद्रकांत सोनवणे, तहसीलदार भाऊसाहेब थोरात, सैन्यदलातील अधिकारी, कर्मचारी, पोलीस दलातील अधिकारी कर्मचारी, ग्रामस्थ मोठ्या संख्येने उपस्थित होते.
