चाळीसगाव तालुक्यात पावणे तीन लाखांचा मुद्देमाल हस्तगत
चाळीसगाव (प्रतिनिधी) : राज्य उत्पादन शुल्काच्या जळगाव व चाळीसगावच्या भरारी पथकाने शुक्रवारी ८ डिसेंबर रोजी हातभट्टीविरुद्ध संयुक्त मोहीम राबवून तालुक्यातील सायगाव व पिलखोड येथे गिरणा नदीकाठी छापा टाकला. याठिकाणी चार इसम गावठी हातभट्टी दारू वाहतूक व निर्मिती करताना मिळून आले. त्यांच्याविरुद्ध गुन्हा दाखल करण्यात आला आहे.
संशयित आरोपींकडून ३ मोटरसायकलसह १६० लिटर गावठी हातभट्टी दारू ३५०० लिटर रसायनसह एकूण २ लाख ७४ हजार ४०० रुपयांचा मुद्देमाल हस्तगत करण्यात आलेला आहे. यात सायगाव येथील विजय हिलाल सोनवणे, रमेश वामन माळी, किरण भास्कर दळवी व सुरेश जुलाल सोनवणे यांच्यावर कारवाई करण्यात आलेली आहे. सदरची कारवाई ही निरीक्षक राज्य उत्पादन शुल्क, जळगावचे निरीक्षक सी.एच. पाटील, जवान आर. जे.पाटील, भाऊसाहेब पाटील, प्रतिकेश भामरे, वाहन चालक मुकेश पाटील यांनी पार पाडली.
