शिवसेना जिल्हाप्रमुख हर्षल माने यांचा इशारा
जळगाव (प्रतिनिधी) :- राज्य शासनाने दुष्काळी तालुके जाहीर करून काही बाबींना सवलत जाहीर केली आहे. यात चाळीसगाव तालुकाही आहे. मात्र खासदारांचाच तालुका दुष्काळी आहे का ? असा सवाल करून शिवसेना ठाकरे गटाचे जिल्हाप्रमुख हर्षल माने यांनी जळगाव जिल्ह्यात सर्वदूर सारखी स्थिती आहे, चाळीसगावसह भडगाव, पाचोरा, एरंडोल, पारोळा हादेखील दुष्काळी पट्टा आहे, असे सांगितले. हे सर्व तालुके दुष्काळी जाहीर करावे अन्यथा जिल्हाधिकारी कार्यालयासमोर तीव्र स्वरूपाचे निदर्शने करू. वेळ पडल्यास उपोषणदेखील करू, असा इशाराही त्यांनी दिला आहे.
जळगावात पद्मालय विश्रामगृह येथे पत्रकार परिषद घेण्यात आली, त्यावेळी ते बोलत होते. यावेळी एरंडोलचे माजी नगराध्यक्ष दशरथ महाजन उपस्थित होते. आमदारांनी वर्षातून एकदा आमसभा घेणे गरजेचे असते. मात्र आ. चिमणराव पाटील यांनी गेल्या चार वर्षात पारोळा-एरंडोल मतदारसंघात एकदाही आमसभा घेतलेली नाही. त्यामुळे जनतेच्या प्रश्नांना वेळ मिळणार कधी असा सवाल हर्षल माने यांनी केला.
तसेच, सत्ताधारी आमदार, खासदारांना सामान्य शेतकऱ्यांशी घेणेदेणे नाही. त्यांना टक्केवारीतच स्वारस्य आहे. जिल्ह्यात सर्वत्र दुष्काळ परिस्थिती असताना केवळ चाळीसगाव दुष्काळी जाहीर करणे हे पक्षपातीपणा दिसून येत आहे, असेही हर्षल माने म्हणाले.
