भुसावळ तालुक्यातील फेकरी फाट्याजवळील घटना
भुसावळ (प्रतिनिधी) : – दोन ट्रकचा समोरासमोर भीषण अपघात होवून एकजण जागीच ठार झाला तर अन्य दोन जण गंभीर जखमी झाल्याची घटना बुधवारी २५ ऑक्टोबर रोजी सकाळी साडेसात वाजेच्या सुमारास फेकरी फाट्यानजीक घडली आहे. याप्रकरणी भुसावळ तालुका पोलीस स्टेशनला अकस्मात मृत्यूची नोंद करण्यात आली आहे.
तालुक्यातील फेकरी फाटाजवळ ट्रक क्रमांक (डब्ल्यूबी ११ ई ५६८६) आणि दुसरा ट्रक यांचा समोरासमोर झालेल्या भीषण अपघात झाला. यात एका ट्रकवरील चालकाचा जागीच मृत्यू झाला तर इतर दोन गंभीर जखमी झाल्याची घटना बुधवारी २५ ऑक्टोबर रोजी सकाळी साडेसात वाजेच्या सुमारास घडली आहे. दरम्यान हा अपघात घडल्यानंतर स्थानिक नागरीकांनी घटनास्थळी धाव घेवून जखमींना बाहेर काढण्यात मदत केली. या अपघातमुळे रस्त्यावरील दोन्ही बाजूची वाहतूक दोन ते तीन किलोमीटरपर्यंत खोळंबली होती.
अपघात झाल्याची माहिती कळताच भुसावळ तालुका पोलीस ठाण्याचे पोलीस कर्मचारी यांनी घटनास्थळी धाव घेवून मृतदेहाचा पंचनामा केला आणि वाहतूक सुरळीत केली. या भीषण अपघातात दोन्ही वाहनांचा चुराडा झाला आहे. जखमींवर सरकारी रुग्णालयात उपचार सुरु आहेत. भुसावळ पोलीस स्टेशनला अकस्मात मृत्यूची नोंद करण्यात आली आहे.
