यावल तालुक्यातील किनगाव येथील घटना
यावल (प्रतिनिधी) :- यावल तालुक्यातील किनगाव रस्त्यावरील स्मशानभूमीजवळ भरधाव आयशर ट्रकने दुचाकीला धडक दिल्याने नायगावातील ३७ वर्षीय तरुण दुचाकीस्वार जागीच ठार झाला. अपघातानंतर चालक वाहनासह पसार होत असताना ग्रामस्थांनी रस्त्यातच त्यास अडवत वाहनाची तोडफोड केली. अपघाताची माहिती मिळताच पोलिसांनी घटनास्थळी धाव घेत वाहन व वाहन चालक यास ताब्यात घेतले. याप्रकरणी यावल पोलिसात अपघाताचा गुन्हा दाखल करण्यात आला आहे.
परशुराम प्रभाकर कोळी (वय ३७, रा. नायगाव ता. यावल) असे मयत तरुणाचे नाव आहे. तो गुरुवारी दुचाकी क्रमांक (एम. एच.१९ यु. ८६४) वरून नायगाव येथून किनगावकडे जात होता. त्याचवेळी आयशर क्रमांक (एम.एच.१७ बी.डी.८०) घेऊन जात असताना त्याने दुचाकीला जबर धडक दिली. अपघातामध्ये परशुराम कोळी हा जागीच ठार झाला तर अपघातानंतर चालक इमरान खान रसूल खान (रा.साकळी, ता.यावल) याने वाहन घेऊन नायगावच्या दिशेने पळ काढला. दरम्यान, ग्रामस्थांनी वाहन थांबवत वाहनाची तोडफोड करीत चालकाला चोप दिला. पोलिसांना माहिती मिळताच त्यांनी घटनास्थळी धाव घेतली.
यावल पोलिसांनी वाहन चालक आणि वाहन ताब्यात घेतले. मयत परशुराम कोळी यांच्या मृतदेहाचे यावल ग्रामीण रुग्णालयात शवविच्छेदन केल्यानंतर मृतदेह कुटुंबांना सोपवण्यात आला. याप्रकरणी यावल पोलिसात चंद्रभान सुधाकर कोळी यांनी दिलेल्या फिर्यादीवरून आयशर ट्रकचालकाविरुद्ध अपघाताचा गुन्हा दाखल करण्यात आला. तपास सहायक फौजदार असलम खान करीत आहे. मयत परशुराम कोळी यांच्या पश्चात आई, भाऊ, पत्नी असा परीवार आहे.
