पारोळा शहरातून गेलेल्या बायपास राष्ट्रीय महामार्गावरून शिवाजी मराठे हे धरणगाव चौफुली रस्ता ओलांडून घरी जाण्यासाठी सायकलने जात होते. त्यावेळी धुळ्याकडून सुसाट वेगाने येणाऱ्या कार क्रमांक (एमएच १८ बीसी ९०७७) ने सायकलस्वाराला जोरदार धडक दिल्याची घटना मंगळवारी ५ सप्टेंबर रोजी रात्री साडेबारा वाजेच्या सुमारास घडली. या धडकेत सायकलस्वार शिवाजी मराठे हे १५ ते २० फुट अंतरावर फेकले गेले. त्यांच्या डोक्याला गंभीर दुखापत झाल्याने जागीच मृत्यू झाला. ही घटना घडल्यानंतर पारोळा पोलिसांनी घटनास्थळी जावून पंचनामा केला. मृतदेह कुटीर रूग्णालयात हलविण्यात आले. दरम्यान, अपघात घडल्यानंतर संतप्त झालेल्या गावकऱ्यांनी महामार्गावरच रास्ता रोको आंदोलन केले. याप्रकरणी कारचालक हनीफ कतुबुद्दिन शेख (वय-३४) रा. धुळे याच्या विरोधात पारोळा पोलीसात गुन्हा दाखल करण्यात आला आहे. पुढील तपास पोलीस नाईक प्रविण पारधी करीत आहे.
