मृत वैद्यकीय अभ्यासक्रमाचा विद्यार्थी, मुंबईच्या केईएम हॉस्पिटलमधील घटना
जळगाव (प्रतिनिधी) – येथील डॉ. संजय पाटील यांचा मोठा मुलगा आदिनाथ संजय पाटील याने मुंबई येथे केईएम हॉस्पिटल, मुंबई येथे ऑनड्युटी (कर्तव्यावर) असताना विषारी इंजेक्शन घेऊन आत्महत्या केल्याची धक्कादायक माहिती सोमवार ३१ जुलै रोजी समोर आली आहे. मयत आदिनाथ हा वैद्यकीय अभ्यासक्रमाच्या पदव्युत्तर पदवीमध्ये शिक्षण घेत होता. त्याची क्षयरोग विभागात ड्युटी लावलेली होती. दरम्यान, पोलिसांनी घटनेची नोंद केली आहे.
आदिनाथ संजय पाटील (वय २४, रा. एकविरा हॉस्पिटल, आकाशवाणी चौक परिसर, जळगाव) असे त्याचे नाव आहे. तो जळगावातील फिजिशियन डॉ. संजय पाटील, डॉ. स्मिता पाटील यांचा मोठा मुलगा होता. आदिनाथ हा मुंबईच्या केईएम हॉस्पिटल येथे गेल्या ६ वर्षांपासून पदवी व त्यानंतर पदव्युत्तर शिक्षण घेत होता. त्याचा लहान भाऊ अजिंक्य हा देखील केईएम हॉस्पिटल येथे पदवीचे वैद्यकीय शिक्षण घेत होता. आदिनाथ पाटील याची क्षयरोग विभागात ड्युटी होती. रविवारी रात्री १ वाजेपर्यंत तो त्याच्या वरिष्ठ डॉक्टरांसह कामावर होता. हसतखेळत असताना त्याने ड्युटी पूर्ण केली.
सोमवारी ३१ रोजी सकाळी कर्मचारी कामावर आल्यावर ८ वाजेच्या सुमारास टीबी विभागाचा दरवाजा आतून बंद दिसला. त्यांनी उघडला असता, आदिनाथ हा बेशुद्धावस्थेत दिसून आला. त्याला तातडीने उपचारार्थ दाखल केले असता तेथे वैद्यकीय अधिकाऱ्यांनी त्याला मयत घोषित केले. त्याच्या हातावर ३ वेळा इंजेक्शन टोचलेले दिसून येत होते. त्यामुळे त्याने विषारी इंजेक्शन घेऊन आत्महत्या केल्याचे प्रथमदर्शनी दिसून आले आहे. संध्याकाळी ५ वाजता त्याचे शवविच्छेदन पूर्ण झाल्यावर मृतदेह जळगावकडे रवाना करण्यात आला आहे.
दरम्यान, आदिनाथ पाटील हा अत्यंत हुशार विद्यार्थी होता. १२ वि नंतर त्याने दिलेल्या नीट परीक्षेत तो राज्यातून दुसरा तर देशातून ८४ वा आलेला होता. रुग्णालयातही तो हसमुख, मनमिळावू, हुशार, प्रामाणिक विद्यार्थी होता, अशी माहिती केईएम रुग्णालयाचे पदव्युत्तर विभागाचे उप अधिष्ठाता डॉ. हरीश पाठक यांनी “केसरीराज” शी बोलताना सांगितले. आदिनाथच्या मृत्यूमुळे केईएमच्या विद्यार्थाना, शिक्षकांना तसेच पाटील परिवाराला धक्का बसला आहे. आदिनाथने अचानक आत्महत्या का केली, याबाबत काहीच माहिती मिळू शकलेली नाही. दरम्यान, भोईवाडा पोलीस स्टेशनला घटनेची नोंद करण्यात आलेली आहे.
