मुक्ताईनगर तालुक्यातील धामणगाव येथील घटना
मुक्ताईनगर (प्रतिनिधी) : तालुक्यातील धामणगाव येथे जुलै २०२० मध्ये विहिरीत आढळून आलेल्या मृतदेहाप्रकरणी तीन वर्षानंतर आता गुरुवारी २७ जुलै रोजी न्यायालयाच्या आदेशान्वये मुक्ताईनगर पोलीस स्टेशनला खुनाचा गुन्हा दाखल करण्यात आला आहे. अद्याप कोणालाही अटक करण्यात आलेली नाही.
गौतम उत्तम गवई (वय ३५,रा. धामणगाव ता. मुक्ताईनगर असे मयत इसमाचे नाव आहे. तीन वर्षांपूर्वी जुलै २०२० मध्ये गौतम गवई यांनी संशयित आरोपी शेख बिस्मिल्ला शेख मज्जिद (वय ४३) आणि राजेंद्र उर्फ राजू ओंकार पाटील (वय ६० दोन्ही रा. धामणगाव) यांना एका महिलेसोबत आक्षेपार्ह अवस्थेत पाहिले होते. त्यामुळे दोघेही संशयित आरोपींनी गौतम गवई यास याबाबत कुठेही वाच्यता करू नको, म्हणून धमकी दिली होती.
त्यानंतर गौतम गवई याचे प्रेत १८ जुलै २०२० रोजी विहिरीत तरंगत असताना आढळून आले होते. याप्रकरणी सुरुवातीला अकस्मात मृत्यूची नोंद करण्यात आली होती. दरम्यान या प्रकरणात गौतम गवई यांची पत्नी कविता उत्तम गवई (वय ४३) या न्यायालयात गेल्या होत्या. न्यायालयातील कामकाजानुसार खटला सुरू होता. दरम्यान आता तीन वर्षानंतर न्यायालयाने संशयित शेख बिस्मिल्ला आणि राजू पाटील यांच्यावर खुनाचा गुन्हा दाखल करण्याचे आदेश दिले.
त्यानुसार मुक्ताईनगर पोलीस स्टेशनला कविता गवई यांच्या फिर्यादीवरून गुरुवारी २७ जुलै २०२३ रोजी दुपारी साडेचार वाजेच्या सुमारास खुनाचा गुन्हा दाखल करण्यात आला आहे. तपास सपोनी संदीप दुनगहू करीत आहेत.
