नंदुरबार जिल्ह्यातील मलगाव येथील घटना
नंदुरबार (प्रतिनिधी) : जिल्ह्यातल्या शहादा तालुक्यातील मलगाव येथे गुरुवारी सकाळी शेतजमिन मालकी हक्काच्या वादातून कुटुंबातील दोन गटात हातात शस्त्रे घेऊन हिंसक हाणामारी झाली. एकाने तर गावठी बंदुकीतून गोळीबार केल्याने पिता पुत्र दगावले असून दोन्ही गटातील सहा जण जखमी झाले आहेत. एकाची प्रकृती गंभीर असल्याने त्यास पुढील उपचारासाठी नंदुरबार जिल्हा रुग्णालयात दाखल करण्यात आले आहे. शहादा पोलिस स्टेशनला सदोष मनुष्य वधासह, वधाचा प्रयत्न करणे या गुन्ह्यासह विविध कलमान्वये परस्पर विरोधी गुन्हे दाखल झाले आहे. काही आरोपींना अटक करण्यात आली आहे.
मलगाव येथे आदिवासी बांधवांना वन जमिनीचे पट्टे मिळाले आहेत. यातील एका वन जमिनीच्या पट्ट्यावरून कुटुंबातील दोन गटात मालकी हक्काचा सुरु वाद होता. यातील एक गटाच्या ताब्यात जमीन असल्याने ते ती जमीन कसत होते. मात्र ती जमीन आपल्या आजोबांना मिळाली असल्याने ती आपल्याला मिळावी असा आग्रह दुसऱ्या गटाचा होता. अश्यातच दुसऱ्या गटाने आज सकाळी शेतात जाऊन शेत ताब्यात घेण्याचा प्रयत्न केला. शेतात कामे करीत असताना दुसरा गट तेथे आला. त्यांच्यात शाब्दिक बाचाबाची होऊन दोन्ही गटात तुंबळ हाणामारी झाली. या हाणामारीत लोखंडी सळ्या, पाईप, लाकडी दांडे व एक गावठी बंदुकीचा सर्रास वापर करण्यात आला. हाणामारीत एका गटातील संशयिताने समोरासमोर गोळीबार केल्याने मलगाव येथील अविनाश सुखराम खर्डे (वय २३ वर्षे) व सुखराम कलजी खर्डे ( वय ४२ वर्षे) यांच्या छातीत व पोटात गोळ्या लागल्या. यात अविनाश खर्डे याचा जागीच मृत्यू झाला तर सुखराम खर्डे याचा उपचारादरम्यान मृत्यू झाला.
या संदर्भात परस्परविरोधी गुन्हे दाखल झाले आहेत. पहिल्या गुन्ह्यात, देविदास रायसिंग खर्डे (वय३० वर्षे) रा. मलगाव ता. शहादा यांच्या फिर्यादीवरून सुनील राजेन्द्र पावरा रा. बेडिया ता. पानसेमल (मध्यप्रदेश), गणेश दिवान खर्डे रा. मलगाव, सोनिबाई गणेश खर्डे रा. मलगाव, अरुण राजेंद्र पावरा रा. बेडिया, ललिताबाई राजेंद्र पावरा रा. बेडिया, रमिबाई दिवान खर्डे रा. मलगाव यांचे विरोधात गुन्हा दाखल करण्यात आला आहे. सकाळी १० वाजेच्या सुमारास शेतात शेतीच्या वादातून हातात लोखंडी सळ्या, लाकडी दांडके व गावठी बंदूक घेऊन हमला केल्याचे नमूद करण्यात आले आहे. बंदुकीतून गोळीबार केल्याचे नमूद करण्यात आले आहे. यात सुखराम कलजी खर्डे हा जखमी झाल्याचे नमूद करण्यात आले आहे. ज्याचा नंतर मृत्यू झाला आहे. रायसिंग कलजी खर्डे (वय ५० वर्षे, रा. मलगाव) हे जखमी झाले आहेत. आरोपींच्या विरोधात मनुष्य वध, वधाचा प्रयत्न, भारतीय हत्त्यार कायदा कलमांसह इतर कलमान्वये गुन्हा नोंद करण्यात आला आहे.
दुसरी फिर्याद सोनिबाई गणेश खर्डे ( वय ३० वर्षे) रा. मलगाव यांनी दिली आहे. यात आरोपी सुखराम कलजी खर्डे, अविनाश सुखराम खर्डे, रायसिंग कलजी खर्डे, ममता सखाराम खर्डे, शकुंतला रायसिंग खर्डे, देहू उर्फ देविदास रायसिंग खर्डे, भावश्या उर्फ निलेश रायसिंग खर्डे व जगदीश रायसिंग खर्डे सर्व रा. मलगाव यांचे विरोधात हातात लोखंडी सळ्या व दांडे घेऊन प्राणघातक हमाला केल्याचे नमूद करण्यात आले आहे. यात गणेश दिवान खर्डे, सुनील राजेन्द्र पावरा, अरुण राजेंद्र पावरा दोन्ही रा. बेडिया व रामिबाई दिवाण खर्डे रा. मलगाव हे जखमी झाले आहेत. सर्व जखमी हे नंदुरबार जिल्हा रुग्णालयात उपचार घेत आहेत.
घटनेची माहिती मिळताच जिल्हा पोलीस अधीक्षक पी. आर पाटील व उपविभागीय पोलीस अधिकारी दत्ता पवार यांच्या मार्गदर्शनात शहाद्याचे पोलीस निरीक्षक शिवाजी बुधवंत, सपोनि प्रतापसिंग मोहिते यांच्यासह पोलीस पथकाने घटनास्थळी जाऊन माहिती घेतली. रात्री उशिरा पर्यंत पोलिसांची कारवाई सुरु होती. तर आरोपींचे अटकसत्र सुरु होते. या घटनेतील गोळीबार करणारे आरोपी मध्यप्रदेश राज्यातील असल्याचे व त्यांनी गावठी बंदूक तेथूनच आणल्याचे समजत आहे.
